Қирғизистон электр энергияси эвазига Қозоғистон ва Ўзбекистонга сув етказиб беради

Қозоғистон, Қирғизистон ва Ўзбекистон сув-энергетика ҳамкорлиги параметрлари ва ўзаро қўллаб-қувватлаш тўғрисида келишиб олди, деб хабар берди Tengrinews Қозоғистон Энергетика вазирлигига таяниб.

Олмаота шаҳрида Қозоғистон энергетика вазири Ерлан Аккенженов раислигида уч мамлакат сув-энергетика идоралари раҳбарларининг йиғилиши бўлиб ўтди.

Томонлар сув-энергетика соҳасидаги ҳамкорликнинг кейинги параметрлари тўғрисида келишиб олдилар. Қирғизистоннинг Тўхтағул сув омборидаги мураккаб вазиятни ҳисобга олган ҳолда, учрашув иштирокчилари ўзаро электр энергияси етказиб бериш орқали бир-бирини қўллаб-қувватлаш, иситиш мавсумини муваффақиятли ўтказиш ва келгуси вегетация мавсумига тайёргарлик кўриш учун биргаликдаги саъй-ҳаракатларни мувофиқлаштиришга қарор қилди.

«Қозоғистон ва Ўзбекистон куз-қиш мавсумида Қирғизистонга электр энергияси етказиб беришга тайёрлигини тасдиқлади. Бу Қирғизистон томонига қишда электр энергияси ишлаб чиқариш ҳажмини камайтириш ва Тўхтағул сув омборида сув тўплаш имконини беради. Жамғарилган ҳажм вегетация даврида жанубий ҳудудлардаги экин майдонларини барқарор суғоришни таъминлаш учун Қозоғистон ва Ўзбекистонга йўналтирилади. Бундан ташқари, минтақада истеъмолни камайтириш ва энергияни тежаш бўйича қўшма чора-тадбирлар кўриш тўғрисида келишувга эришилди», дейилади хабарда.

Тўхтағул сув омбори - Қирғизистоннинг Жалолобод вилоятидаги Норин дарёсидаги сунъий сув ҳавзаси бўлиб, Марказий Осиёнинг асосий энергетика ва ирригация объектларидан биридир. У мамлакат гидроэнергетикасининг «юраги» ролини ўйнайди, электр энергиясининг 80 фоизигача таъминлайди, шунингдек, Қирғизистон ва Ўзбекистонда далаларни суғориш учун оқимни тартибга солади.

Йиғилиш якунлари бўйича 2026 йил вегетация даври учун қишки электр энергияси етказиб бериш ва сув захирасини тўплаш ҳажмларини ҳуқуқий жиҳатдан мустаҳкамловчи уч томонлама баённома имзоланди.