Трамп Путин ва Зеленский учрашуви эҳтимолини баҳолади

Россия, АҚШ ва Украина саммити бўлиб ўтади, аммо Россия ва Украина президентлари Владимир Путин ва Володимир Зеленский учрашадими ёки йўқми – номаълум. Бу ҳақда АҚШ президенти Доналд Трамп Daily Caller нашрига маълум қилди.

«Уч томонлама учрашув бўлиб ўтади. Икки томонлама [Путин ва Зеленский учрашуви] ҳақида билмайман, лекин уч томонлама бўлади. Биласизми, баъзан одамлар бунга тайёр бўлмайди», – деди у.

Президент ўз фикрини изоҳларкан, шундай ўхшатиш келтирди.

Сизда бола бор, майдончада бошқа бола бор, улар бир-бирларини ёмон кўришади, қўлларини силкитишади, силкитишади ва сиз улар тўхташини хоҳлайсиз, улар эса давом этишади. Бироз вақт ўтгач, улар ўзлари ҳам тўхташни хоҳлашади, тушуняпсизми? Бу деярли бир хил. Баъзан уларни тўхтатишдан олдин бир оз уришишлари керак бўлади. Лекин бу жуда узоқ давом этяпти. Жуда кўп одамлар ҳалок бўлди.

Россия-Украина урушини тугатиш – Доналд Трампнинг сайловолди ваъдаларидан бири бўлганди. АҚШ маъмурияти феврал ойи ўрталаридан бери Москва ва Киев билан можарони тўхтатиш бўйича алоҳида музокаралар олиб бормоқда, аммо деярли ҳеч қандай натижага эришилмади.

Трамп 15 август куни Аляскада бўлиб ўтган саммитдан кейин Зеленский ва Путин учрашувига тайёргарлик бошланганини эълон қилганди. Россия ТИВ раҳбари Сергей Лавров Путин Зеленский билан учрашишга тайёрлигини, бироқ олий даражада кўриб чиқилиши керак бўлган барча масалалар пухта ишлаб чиқилиши кераклигини таъкидлади.

Зеленский, ўз навбатида, Украина музокараларга тайёрлиги, бироқ ўзи учун Трамп иштирокидаги уч томонлама формат афзалроқ эканини айтди.

Германия канцлери Фридрих Мерц 28 август куни Путин ва Зеленский учрашуви бўлмаслигини айтди.