Қўшимча функционаллар
-
Тунги кўриниш
АҚШ Сербия компаниясига РФ улушини сотиш бўйича музокаралар учун муддат берди
АҚШ ҳокимияти Сербиянинг нефт қайта ишлаш компанияси NIS’га Россияга тегишли улушни сотиш бўйича музокаралар олиб бориш учун 2026 йил 24 мартгача муҳлат берди. Бироқ компанияга нефт сотиб олиш ва уни қайта ишлашга рухсат берадиган лицензия тақдим этилмади.
Фото: Getty images
АҚШ Сербияда нефтни қайта ишлаш билан шуғулланувчи NIS компаниясига россиялик эгаларига тегишли улушни сотиш бўйича музокаралар олиб бориш учун 2026 йил 24 мартгача вақт берди. Бу ҳақда Сербия давлат телекомпанияси RTS 24 декабр, чоршанба куни хабар қилди.
Шу билан бирга, хабарда таъкидланишича, NIS компаниясига хом нефт сотиб олиш ва қайта ишлаш имконини берадиган операцион лицензия берилмаган. АҚШ Молия вазирлигининг Хорижий активлар назорати бошқармаси (OFAC) 2025 йил октябр ойида NIS’га нисбатан санкциялар жорий қилган. Бу чоралар Россиянинг Украинага қарши давом этаётган тажовузи фонида РФ энергетика секторини нишонга олган кенгроқ санкциялар пакети доирасида қабул қилинган.
Ушбу санкциялар Хорватия орқали ўтадиган JANAF қувури бўйича нефт етказиб беришнинг тўхташига ва Панчево шаҳридаги нефт қайта ишлаш заводида ишлаб чиқаришнинг тўхтатилишига олиб келган.
Россиянинг “Газпром” компанияси NIS акцияларининг 11,3 фоизига, санкциялар остидаги нефт бўлинмаси — “Газпром нефть” эса 44,9 фоизига эгалик қилади. Сербия ҳукуматига 29,9 фоиз тегишли, қолган улуш эса майда акционерлар ва компания ходимлари қўлида.
Сербия президенти Александар Вучич сешанба куни “Газпром” Венгриянинг MOL компанияси билан NIS’даги назорат пакетини эҳтимолий сотиш бўйича музокара олиб бораётганини айтган.
