Туркиянинг Сурияга ёндош, чегарадош Ҳатай вилояти 6 феврал зилзилаларидан энг кўп жабр кўрган ҳудудларидан бири. Ҳатайнинг Овакент қишлоғида 40 йилдан бери 10 мингдан ортиқ этник ўзбеклар яшаб келишади. Kun.uz мухбири Туркиядаги зилзилалар оқибатларини ўрганиш давомида Овакент қишлоғида ҳам бўлиб, у ерлик ўзбеклар билан суҳбатлашди.
“Аср фожиаси” дея айтилаётган зилзилалар оқибатида 150 га яқин овакентлик ҳалок бўлган. Шундан 70 нафарга яқини болалар бўлган.
Овакентлик Ҳанифахон ая Ер силкинган ўша мудҳиш тонгни шундай хотирлайди:
“Намоз вақти бўлган бўлса, намозимни ўқий, дедим. Соатга қарасам, тўрт бўлган экан. Ҳали олти яримда азон айтади, унгача ўтириб турай, дедим. Ўтиришим билан “гувуллаб кетди”. Ўғлимнинг олдига бориб, “туринглар, ер қимирлаяпти” деб уйғотдим. Ҳаммани уйғотиб, остонага чиққунча зилзила “олиб урди”. Ўғлимга оралиқдан юрма, дедим. Гапимдан шошиб қолиб, оралиқдан югуриб кетаётганда деворга урилди. Ўзи шифохонага тушди. Қўлидаги 1 ёшли ўғлининг аҳволи яхши”.
1982 йилда Овакентга кўчиб келган ўзбеклар 1 қаватли коттеж уйлар билан таъминланган. Уйлар эскира бошлагач, шароитлари ҳам ўнглана борган овакентликлар ўзлари учун эски хонадонлари ўрнида 2-3 қаватли уйлар қура бошлашган.
Кўп қаватли уйларнинг асосан 1-қавати ер силкиниши оқибатида қулаб тушиб, 2-қават 1-қават ўрнига тушиб, босиб қолган. Маҳаллалар электр энергияси, ичимлик суви, алоқа ва барча инфратузилмалардан узилган.
“Биз 20 йил аввал Афғонистондан Туркияга кўчиб келганмиз. Ўтган йиллар ичида кичик ер силкинишлари бўлиб турган. Лекин бундай даҳшатли зилзилани кўрмадик. Катта бир офат келди. Кўп ақраболаримизни йўқотдик”, — дейди овакентлик Иқбол Ўзбек.
Бошқа зилзила ҳудудларида бўлгани каби Овакентда ҳам айни пайтда аҳоли вақтинчалик чодирлар билан таъминланган. Кўнгиллилардан иборат ёшлар эса болалар учун турли кўнгилочар тадбирлар уюштиришмоқда.
Сардорбек Усмоний, журналист
