WSJ: АҚШ ва Туркия С-400 бўйича можарони ҳал қила олмади

Америка ва Туркия расмийларининг шу ҳафта бўлиб ўтган маслаҳатлашувлари Россияга тегишли С-400 зенит ракета комплексларининг Туркия томонидан сотиб олиниши бўйича келишмовчиликларни бартараф эта олмади. Бу ҳақда The Wall Street Journal газетаси ёзмоқда.

Нашр маълумотларига кўра, Туркия президентининг расмий вакили Иброҳим Калин Америка томонига С-400 сотиб олиниши туфайли АҚШ эҳтимолий санкциялари икки томонлама алоқаларга зарар етказиши ва самарасиз бўлиши мумкинлиги ҳақида маълум қилган. Шунингдек, унинг билдиришича, Туркия Американинг Patriot зенит ракета комплексларини харид қилишга ва қайси тизим яхшироқ эканлигини текшириб кўришга тайёр.

Газетадан таъкидланишича, келгуси ойлар ичида Туркия С-400’ни жойлаштиришни бошлаши мумкин. Бу музокаралар кириб қолган «боши берк кўчадан» чиқиш йўлини қидиришга вақт кам қолганини англатади.

Бундан олдин, Эрдўған С-400 бўйича муддатлар ўзгаришини истисно этмаганди.