Трамп Нобел мукофотини олмагач, энди тинчлик ҳақида қайғуришга мажбур эмаслигини айтди

Мактуб матни PBS мухбири Ник Шифрин томонидан эълон қилинди. У Европа давлатларининг Вашингтондаги элчиларига йўлланган - улардан Трампнинг Норвегия бош вазирига йўллаган мактубини ўз ҳукумати раҳбарларига етказиш сўралган.

«Ҳурматли Йонас! Мамлакатингиз саккиз ва ундан ортиқ урушнинг олдини олганим учун менга тинчлик бўйича Нобел мукофотини бермасликка қарор қилганини ҳисобга олсак, мен энди фақат тинчлик ҳақида қайғуриш мажбуриятини ҳис қилмайман, гарчи у ҳар доим устувор бўлса-да, энди мен Америка Қўшма Штатлари учун нима яхши ва тўғри эканини ўйлашим керак. Дания бу ерни Россия ёки Хитойдан ҳимоя қила олмайди ва нега уларда мулк ҳуқуқи бўлиши керак? Бу ҳақда ҳеч қандай ёзма ҳужжат йўқ, фақат у ерга юз йиллар олдин қайиқ сузиб борган, лекин бизнинг қайиқлар ҳам борган. Мен НАТО учун у ташкил этилганидан бери бошқалардан кўра кўпроқ иш қилдим ва энди НАТО Қўшма Штатлар учун нимадир қилиши керак. Агар биз Гренландияни тўлиқ ва буткул назорат қилмасак, дунё хавфсиз бўлмайди», деб ёзган Трамп.

Йонас Гар Стёре бу мактубни 18 январ куни Трампдан олганини тасдиқлади. Норвегия бош вазири сўзларига кўра, мактуб шу куниёқ АҚШ президентига ўзи ва Финляндия президенти Александр Стубб номидан юборган қисқа хабарига жавобан келган. Стёре ва Стубб Трампнинг Европанинг саккизта давлатига қарши божлар жорий этиш таҳдиди бўйича ўз позицияларини баён қилган ва телефон орқали суҳбат ўтказишни сўраган.

17-18 январ кунлари Гренландия атрофидаги вазият кескинлашди. Трамп Гренландияга ўз ҳарбийларини юборган саккизта давлатга божлар жорий этиш билан таҳдид қилди. Европа етакчилари бу таҳдидларни «нотўғри» ва «қабул қилиб бўлмайдиган» деб атади ҳамда жавоб чораларини белгилаш учун шошилинч учрашувлар ўтказишни режалаштирди.

АҚШ президенти Доналд Трамп 2025 йил давомида бир неча урушларга барҳам берганини айтиб, тинчлик бўйича Нобел мукофотига лойиқ эканини астойдил таъкидлаб келган эди. Бироқ, Норвегиянинг Нобел мукофоти қўмитаси мукофотни Венесуэла мухолифати вакили Мария Корина Мачадога топширди.

Ўз навбатида Мачадо 16 январ куни Нобел мукофоти медалини Трампга совға қилди ва АҚШ президенти бунга кўпроқ лойиқ эканини айтди.