Швейцариядаги курортда портлаш: ўнлаб инсонлар вафот этгани айтилмоқда

31 декабрдан 1 январга ўтар кечаси Швейцариянинг Алп тоғларидаги курорт шаҳарча – Краст-Монтада Янги йилни нишонлаётган одамлар билан тўла барда кучли портлаш юз берди. Унинг ортидан эса йирик ёнғин келиб чиққан. Маҳаллий полицияга маълумотларига кўра, оқибатда ўнлаб одамлар ҳалок бўлган деб тахмин қилинмоқда. Қарийб 100 киши жароҳатланган, уларнинг аксарияти оғир аҳволда.

An explosion and fire ripped through a popular bar in the Swiss ski resort of Crans-Montana during New Year’s celebrations. Police say at least 10 people are dead, and many more wounded. pic.twitter.com/K75kzRTGOX

— Al Jazeera English (@AJEnglish) January 1, 2026

Reuters’нинг ёзишича, портлашдан кейинги ёнғин – маҳаллий вақт билан 01:30 да «Le Constellation» номли барда бошланган. Портлаш сабаби ҳозирча номаълум, бироқ расмийлар ҳодиса тасодиф бўлиши мумкинлигини айтди.

«Ҳозирча биз буни ёнғин сифатида кўриб чиқяпмиз ва ҳужум эҳтимолини кўриб чиқмаяпмиз,» деди кантон прокурори Беатрис Пиллоуд матбуот анжуманида. У иш юзасидан тўлиқ тергов бошланганини қўшимча қилди.

«Қурбонларни аниқлаш учун суд-тиббий экспертизага жуда катта ресурслар сафарбар қилинган. Бу ресурслар жасадларни имкон қадар тезроқ оилаларга топширишимиз учун мўлжалланган,» деди прокурор.

Кантон полицияси раҳбари Фредирик Гислер кечаси содир бўлган воқеа барчани ларзага солганини айтди.

«Бизнинг ҳисобимизга кўра тахминан 100 киши жароҳатланган, уларнинг кўпчилиги оғир. Афсуски ўнлаб одамлар ҳалок бўлган, деб тахмин қилинмоқда. Ҳозирда қурбонларни аниқлаш ва уларнинг оила аъзоларига хабар бериш ишлари олиб борилмоқда. Бироқ бу вақт талаб қилади ва ҳозирча аниқроқ рақам айтиш эрта,» дея полиция бошлиғининг сўзларини келтирмоқда Associated Press.

Аввалроқ полиция кўплаб одамлар куйиш жароҳатлари билан даволанаётганини ва ҳудуд бутунлай ёпилганини, Кранс-Монтана устидан учиш тақиқланган ҳудуд жорий этилганини билдирган эди. Воқеа жойига 10 та вертолёт ва 40 та тез ёрдам машинаси сафарбар қилинган.

Reutersʼнинг ёзишича, Италия ташқи ишлар вазирлиги Швейцария полициясидан олинган маълумотларга кўра қурбонлар сони тахминан 40 нафар эканини айтган. Бироқ аниқ рақамлар келтирмаган. Италия ташқи ишлар вазири Антонио Таянининг айтишича, ёнғин эҳтимол мушакбозлик сабаб юзага келган бўлиши мумкин.

Маҳаллий ҳукумат раҳбари Матиас Ренарднинг айтишича, жароҳатланганлар шу қадар кўплигидан минтақавий шифохонадаги реанимация бўлими ва операция заллари тўлиб кетган. Жароҳатланганлар орасида бошқа мамлакат фуқаролари ҳам борлигини айтилди.

Франциянинг BFMTV телеканалига гапирган гувоҳлардан бири одамлар ёнғиндан қочиш учун деразаларни синдираётганини, баъзилари оғир жароҳатланганини, ваҳимага тушган ота-оналар эса болалари ҳақида билиш учун воқеа жойига шошилаётганини тасвирлаб берди.

Денгиз сатҳидан тахминан 3 000 метр баландликда, Швейцария Алп тоғларининг марказида жойлашган Кранс-Монтана дунёнинг йирик йирик қишки спорт марказларидан бири ҳисобланади. У тоғ чанғиси бўйича Жаҳон кубоги мусобақаларининг асосий майдонларидан бири бўлиб, 2027 йил февралида икки ҳафта давом этадиган навбатдаги жаҳон чемпионатига мезбонлик қилади.