Паулу Бенту Ўзбекистон миллий жамоасини бошқариш таклифини рад этди – ОАВ

Португалиялик мураббий Паулу Бенту Ўзбекистон миллий жамоасини бошқариш ҳақида таклиф олди, аммо ҳозир лойиҳага раҳбарлик қилишнинг мавриди эмаслигини тушунди. Бу ҳақда Португалия нашрлари хабар берди.

«Ўзбекистон миллий жамоаси 2026 йилда бўлиб ўтадиган навбатдаги жаҳон чемпионатига йўлланмани қўлга киритди ва финал босқичида Паулу Бенту жамоани бошқаришини кутган эди. Бироқ, португалиялик мутахассис учун таклиф қилинган шартлар етарли даражада жозибадор эмас эди», деб ёзди O Jogo.

«56 ёшли португалиялик мураббий лойиҳада иштирок этиш учун зарур деб ҳисоблаган шартлар бажарилмаганини тушуниб етган ва шу сабабли таклифни рад этган», деб ёзди Record.

Португалия нашрлари айнан қайси шартлар Паулу Бентуни қониқтирмагани ҳақида батафсил маълумот бермади.

Қайд қилинишича, турли жамоалар 2026 йилги жаҳон чемпионати йўлланмаси учун курашаётган бир пайтда, Паулу Бенту ишга қайтиш учун зарур шарт-шароитларни таъминлайдиган имкониятни кутиш мақсадида янги таклифларга очиқ қолмоқда.

Паулу Бенту мураббийлик фаолиятини 2005 йил ватанида, «Спортинг» клубида бошлаган. Кейинроқ, Бразилиянинг «Крузейро», Грециянинг «Олимпиакос» ва Хитойнинг «Чунцин Лифан» клубларида ишлаган.

2010 ва 2014 йиллар оралиғида Португалия миллий жамоасини бошқариб, Евро-2012 яримфиналига олиб чиқди. Кейинчалик Жанубий Кореяни Қатарда бўлиб ўтган ЖЧ-2022 финал босқичига олиб чиқиб, Осиёда ҳам ҳурматга сазовор бўлди. Сўнгги йилларда БАА миллий жамоасида ишлади.

Айни пайтда Ўзбекистон миллий жамоасини Темур Кападзе бошқариб турибди. ЎФА Паулу Бенту билан музокара ўтказгани ҳақида ҳеч қачон хабар бермаган.