Украина номидан Россияга кўрсатилаётган босим давом этади – MI6

MI6ʼнинг янги раҳбари Блез Метревели ўзининг илк оммавий нутқида Россия томонидан келаётган «ўта кескин таҳдид» ҳақида огоҳлантирди.

Reutersʼнинг ёзишича, у «гибрид уруш» деб аталадиган усулларни алоҳида таъкидлаган. Бунга киберҳужумлар, шунингдек, муҳим инфратузилма объектлари яқинида Россияга алоқадор тузилмалар учиргани гумон қилинаётган дронлар киради.

Метревели бу ҳолатни «тажовузкор, кенгайишпараст ва ревизионист Россия томонидан юзага келаётган ўта жиддий таҳдид» сифатида таърифлаган.

У Украинадаги урушга ишора қилар экан, Буюк Британия Украина номидан президент Владимир Путинга босимни давом эттиришини қатъий таъкидлайди.

«(Владимир) Путин шубҳа қилмасин: бизнинг қўллаб-қувватлашимиз узлуксиздир. Украина номидан кўрсатаётган босимимиз давом этади. Хаос экспорти Россиянинг халқаро майдондаги ёндашувида камчилик эмас, балки ўзига хос хусусиятдир. Ва биз Путин ўз ҳисоб-китобларини ўзгартиришга мажбур бўлгунига қадар бу ҳолат давом этишига тайёр бўлишимиз керак», дея Метревелининг сўзларини келтирмоқда Reuters.

Блез Метревели октябр ойида Ричард Мурнинг ўрнини эгаллади ва Британия Ташқи разведка хизматининг (MI6) 100 йилдан кўп тарихида ушбу лавозимни эгаллаган илк аёл раҳбар бўлди.

BBC нашрининг ёзишича, MI6ʼга 1999 йилда ишга кирган Метревели юқори лавозимга "Q Branch" орқали етиб келган. Бу тузилма – Ташқи разведка хизматининг ёпиқ ва махфий бўлими бўлиб, у агентларга фош этилмасдан ва қўлга тушмасдан ўз раҳбарлари билан алоқа қилиш имконини берадиган турли техник воситалар ва қурилмаларни ишлаб чиқади.

Шу сабабли у ўз нутқида Британия хавфсизлигига таҳдидларга қарши курашишда технологиялардан фойдаланишни кескин ошириш зарурлигини таъкидлаган.

«Технологияни пухта эгаллаш қилаётган ишларимизнинг барчасига сингиб кетиши керак: фақат лабораторияларимизда эмас, балки амалиётда, касбий услубларимизда ва энг муҳими, ҳар бир ходимнинг тафаккурида. Биз код сатрларини инсон манбалари билан ишлаганчалик эркин тушунишимиз, Python’да бир нечта тилларда гапиргандек равон бўлишимиз шарт», — дейди у.

Нашрга кўра, маълумот ҳал қилувчи аҳамият касб этаётган, биометрик текширувлар чегаралар ва назорат пунктларида сохта шахсларни бир неча сонияда фош қила оладиган даврда жосуслар энди аввалгидек ёлғон шахсиятларга таяниб ишлай олмайди. Шу шароитда MI6 ўзининг ҳануз долзарб ва самарали эканини исботлаши лозим.

Шунингдек, Буюк Британия қуролли кучлари бошлиғи Ричард Найтон ҳам душанба куни алоҳида нутқида тобора кучайиб бораётган ноаниқлик ва таҳдидлар шароитида мудофаа масаласида «бутун жамият» ёндашувига чақирди.

Унинг таъкидлашича, Россия НАТОни синовдан ўтказиш, чеклаш, парчалаш ва охир-оқибат йўқ қилиш ниятида эканини очиқ кўрсатиб келмоқда.

«Буюк Британиянинг жавоби фақат қуролли кучларни кучайтириш билангина чекланмаслиги керак». Унинг сўзларига кўра, «тийиб туриш – Буюк Британиянинг барча салоҳиятини: университетлардан тортиб саноатгача, темирйўл тармоғи ва Миллий соғлиқни сақлаш хизматигача сафарбар этиш»ни англатади.

«Янги мудофаа даври фақат ҳарбийлар ва ҳукуматнинг ҳаракатга келиши эмас, балки бутун миллатнинг ҳаракатга келишини англатади», дейди Ричард Найтон.

Буюк Британия 2022 йилда Россиянинг Украинага бостириб киришидан буён бир қатор россиялик бизнесменлар, сиёсий етакчилар, компаниялар ва GRU — ҳарбий разведка агентлигига нисбатан санкциялар жорий қилган.

Бу Буюк Британия – кўпайиб бораётган таҳдидларга ҳозиргидан кўра яхшироқ тайёр бўлишига доир навбатдаги огоҳлантиришлардан биридир.