АҚШ Россия ва Эрон нефтига берилган вақтинчалик енгилликни бекор қилмоқчи

Бессентнинг айтишича, Эрон энергия ташувчилари бўйича аввал берилган бир марталик истиснони узайтириш масаласи умуман кун тартибида йўқ.

У Россия нефти бўйича аввалги истисно апрель ойи ўрталарида Жаҳон банки ва Халқаро валюта жамғармаси йиғилишлари вақтида “10 дан ортиқ энг заиф ва қашшоқ мамлакат”нинг илтимосига кўра қабул қилинганини айтди.

“Бу заиф ва қашшоқ мамлакатлар учун қилинган эди. Аммо яна бир бор узайтириш бўлишини тасаввур қила олмайман. Менимча, денгиздаги Россия нефти асосан тугаб бўлди”, — деди у.

Шу билан бирга, Скотт Бессентнинг фикрича, Эронга нисбатан босим тез орада Теҳронни нефть қазиб олишни қисқартиришга мажбур қилади.

“Ўйлашимизча, яқин икки-уч кун ичида улар қазиб олишни қисқартиришни бошлашга мажбур бўлади. Бу эса уларнинг қудуқлари учун жуда ёмон бўлади”, — деди АҚШ молия вазири.

18 апрель куни Reuters агентлиги АҚШ 16 майгача танкерларга аллақачон юкланган Россия нефти ва нефть маҳсулотларини сотишга рухсат берувчи лицензияни узайтиргани ҳақида хабар берган эди. Бунгача Скотт Бессент Вашингтон истисноларни узайтирмаслигини айтганди.

Россия нефти экспортига нисбатан АҚШ томонидан аввалги енгилликлар 13 март куни жорий этилган. Бу қарор Эрондаги уруш ва Ҳўрмуз бўғозининг ёпилиши ортидан энергия ташувчилар нархи ошгани шароитида қабул қилинган бўлиб, 30 кун амал қилган. Ўшанда Бессент буни “тор доирадаги ва қисқа муддатли” чора деб атаган ҳамда у Москва нефть даромадларига жиддий таъсир кўрсатмаслигини таъкидлаган.

Шунга қарамай, The New York Times газетаси 13 апрель куни АҚШ санкцияларни юмшатганидан кейин Россия нефть сотишдан ҳар куни 100 млн доллардан ортиқ қўшимча даромад олганини хабар қилган.

Вақтинчалик чекловларни юмшатишга, жумладан, Украина президенти Володимир Зеленский ва Украинанинг АҚШдаги элчиси Ольга Стефанишина қарши чиққан.