«Снос»дан кейин тўрт болам билан ижарада яшаб юрибмиз». Термиз шаҳри ҳокими бева аёлнинг компенсация пулини қачон тўлаб беради?

Яқинда Kun.uz таҳририятига Сурхондарё вилояти Термиз шаҳрида истиқомат қилувчи фуқаро Аширгул Тўраева мурожаат қилди. Мурожаатда айтилишича, унинг уйи шаҳар ҳокимлиги томонидан бузиб ташланган, лекин ҳозирга қадар уйнинг компенсация масаласи ижобий ҳал этилмаган.

Маълум бўлишича, Аширгул Тўраева 4 нафар фарзанди билан шаҳарнинг Истиқлол кўчасидаги 76/4 хонадонда яшаб келган. Шаҳарда қурилишлар авж олгач, уларнинг уйи ҳам «снос»га тушган. Жорий йилнинг 24 апрелида Термиз шаҳар ҳокимлиги ва Аширгул Тўраева ўртасида 49-сонли келишув битими тузилган.

Унга кўра, Вазирлар Маҳкамасининг 97-сонли қарори асосида Аширгул Тўраеванинг мулки давлат ва жамоат эҳтиёжи учун, кўп қаватли уй қуриш учун бузилиши белгиланган. Эвазига битимга қуйидагилар киритилган:

-        Фуқаро компенсация маблағини олганидан сўнг, икки кун ичида уй-жойни бўшатиб беради;

-        Ҳокимлик 92 430 000 (тўқсон икки миллион тўрт юз ўттиз минг сўм) маблағни тўлаб беради;

-        Ҳокимлик 30 кун ичида фуқарога уй-жой қуриш учун Термиз туманининг Термиз шаҳар ҳудудига ўтган қисмидан 400 кв.м. майдонни ажратиб беради.

Лекин шаҳар ҳокимлиги битимда кўрсатилган шартларни тўлиқ бажармаган. Икки кун ичида берилиши керак бўлган компенсация маблағларини сал кам беш ой вақт ўтган бўлишига қарамай берилмаган. Компенсация тўланмасдан уй бузиб ташлаган.

 «Ёлғиз бошим билан ижарама-ижара яшаб юрибман. Ҳар ой ижарага 800 минг сўмга яқин пул сарфлаяпман. Ҳокимликнинг эса парвойи фалак.

Агар ўшандаёқ компенсация пули берилганида эди, аллақачон уйнинг кўп қисмини битирган бўлар эдик. Энди нима қиламиз? Куз ҳам келди. Шундай вақтда қурилиш бошлаш эса аҳмоқлик бўлади. Режаларимиз бир йилга кечикадими? Улар ҳам бизнинг ўрнимизга ўзларини қўйиб кўрса яхши бўларди. Мен бевага ҳам осон эмас...», дейди Аширгул Тўраева.

Шундан сўнг, изоҳ олиш мақсадида Термиз шаҳар ҳокимлиги билан боғландик. Ҳокимликдагилар пул тушиши билан маблағ берилишини айтишди.

Лекин пул нега ўз вақтида берилмади? Нега ҳокимлик ўз ташаббуси билан тузилган келишув битими шартларини бажармай келмоқда? Пул Молия вазирлигидан тушиши керакми ёки бошқа жойданми? Ҳокимликка берилган бу саволларга тўлиқ жавоб ололмадик.

Термиз шаҳар ҳокимлиги ваъдасини қачон бажаради? Фуқаро томонидан шу вақтгача ва бундан кейин ижара уйга сарфланган маблағ масаласи нима бўлади? Улар шу йўcинда яшашда давом этишадими? Келишув битими шартларини бажармай келаётган шаҳар ҳокими И.Худойбердиевга юқори ташкилотлардан чора кўриладими ёки йўқ? Ҳокимлар қачон белгиланган норматив-ҳуқуқий-ҳужжатларга тўлиқ амал қилишни бошлайди? Бу саволлар ҳам ҳозирча очиқ қолмоқда.

Kun.uz воқеалар ривожини кузатишда давом этади.

Зафарбек Солижонов