Путин пенсия ёши оширилиши ҳақидаги қонунни имзолади

Россия президенти Владимир Путин “РФнинг пенсияни тайинлаш ва тўлаш масалалари бўйича баъзи қонун ҳужжатларига ўзгартиришлар киритиш ҳақида”ги қонунини имзолади.  

Пенсия ислоҳотлари ҳақидаги қонунда Россияда эркаклар учун пенсияга чиқиш ёшининг босқичма-босқич 5 йилга, яъни эркаклар учун 65 ёшгача, аёллар учун 60 ёшгача оширилиши кўзда тутилган. 

Пенсия ёши оширилиши (ҳар йили бир йилга) 2019 йилдан бошлаб 2023 йилгача амалга оширилади.

Қонунга кўра, эркаклар учун пенсияга муддатидан олдин чиқиш ҳуқуқини берувчи стаж 42 йилни, аёллар учун 37 йилни ташкил қилади. Жамғариб борилувчи пенсия ҳозирдагидек аёллар учун 55 ёшдан, эркаклар учун 60 ёшдан тўланади.

Путин, шунингдек,  Россия Жиноят кодексига пенсия ёшига етиб қолганларга ишга олишни рад этганлик учун 200 минг рубл жаримани кўзда тутувчи ўзгаришлар киритиш ҳақидаги қонунни имзолади.  

Россияда фуқароларнинг пенсияга чиқиши ёши ўзгаргани ва пенсия ёшига етиб қолганларга ишга қабул қилишни асоссиз рад этиш ва уларни асоссиз ишдан бўшатиш ҳолатларини истисно қилиш мақсадида бундай ҳаракатлар учун жиноий жавобгарлик киритилади.

Пенсия ёшига етиб қолганларга ишга олишни рад этганлик ёки бўшатганлик 200 минг рублгача ёки судланувчининг 18 ойгача бўлган ойлик маоши ёки бошқа даромади миқдорида, ёки 360 соатгача мажбурий ишлар билан жазоланади.

Россияда пенсияолди ёши пенсия белгиланишигача 5 йил қолган вақтдан кейинги давр ҳисобланади. 

Россия раҳбари, шунингдек, 2019 йилдан коррупциячилардан мусодара қилинган маблағларни Россия пенсия жамғармасига йўналтиришга рухсат берувчи қонунни имзолади.