Оқ уй сенатни Россияга қарши «қақшаткич» санкцияларига оид қонун лойиҳасини юмшатишга чақирди

АҚШ президенти Доналд Трамп маъмурияти республикачи сенатор Линдси Грэмни Россияга қарши санкцияларга оид ўзи илгари сураётган қонун лойиҳасини юмшатишга ундамоқда, деб ёзади The Wall Street Journal. Сенатор агар Москва тинчлик музокараларидан воз кечса, чекловлар жорий этишни таклиф қилган.

Газета маълумотларига кўра, сўнгги ҳафталарда Оқ уй вакиллари сенатор Грэмнинг офисига норасмий алоқага чиққан ва уни қонун лойиҳасини юмшатишга чақирган. Трамп маъмурияти вакиллари ҳужжатга президент чекловларни кимларга нисбатан жорий этишни танлаш имкониятига эга бўладиган истиснолар киритишни таклиф қилган.

Хусусан, Грэмга қонун лойиҳасининг бутун матнида «shall» («мажбур») сўзини «may» («мумкин») сўзига алмаштириш таклиф этилган. Оқ уй бу йўл билан ҳужжатдаги мажбурий талабларни бекор қилишга интилмоқда.

Қонун лойиҳасининг ҳаммуаллифларидан бири, Демократик партия вакили сенатор Ричард Блюментал Оқ уй билан ёпиқ эшиклар ортида маслаҳатлар бўлганини тасдиқлаган. Шу билан бирга, у учрашувлар мазмунига изоҳ беришдан бош тортган.

WSJ’нинг қайд этишича, ҳар қандай маъмурият овоза бўладиган қонун лойиҳаларига ўзгартиришлар киритишни сўрайди, шу орқали президентга кўпроқ ваколат беришга уринади. «Аммо санкцияларнинг мажбурий характерини бекор қилиш Гр’м қонун лойиҳасини «тишсиз» қилади, дейди ходимлар. Уларнинг таъкидлашича, Трамп шундоқ ҳам ўз ихтиёри билан санкциялар жорий этиши мумкин», — дейилади мақолада.

Россияга қарши бирламчи ва иккиламчи санкцияларга оид икки партияли қонун лойиҳасини 80 нафардан ортиқ сенатор қўллаб-қувватлаган. Унинг доирасида Россиянинг юқори мартабали амалдорларига чекловлар жорий этиш, шунингдек, РФ нефт маҳсулотлари, табиий газ ёки уранини харид қилаётган мамлакатлар импортига 500 фоизли божлар қўллаш таклиф қилинган. Қонун лойиҳаси муаллифлари санкцияларни «қақшаткич» деб таърифлаган.

WSJ’га кўра, Доналд Трамп қонун лойиҳаси унинг АҚШ ва Россия муносабатларини яхшилаш йўлидаги уринишларига зарар етказиши мумкинлигидан хавотирда.