Исроил бош вазири авиазарба учун Қатардан узр сўради – ОАВ

Исроил бош вазири Бинямин Нетаняҳу 28 сентябр куни Қатар бош вазири Муҳаммад бин Абдураҳмон Ол Сонийга қўнғироқ қилиб, Қатар суверенитетини бузгани ва 9 сентябр куни Исроилнинг Доҳага берган зарбаси оқибатида Қатар хавфсизлик хизмати ходими ҳалок бўлгани учун узр сўради. Бу ҳақда Axios Исроилнинг уч нафар расмийсига таяниб хабар берди.

Исроил ва Қатар расмийлари бу ҳақда эълон қилмади.

Axios нашрининг таъкидлашича, «узр сўраш» Қатарнинг Ғазодаги урушни тўхтатиш ва гаровга олинганларни озод қилиш бўйича музокараларда Исроил ва ҲАМАС ўртасидаги воситачилигини қайта тиклаш учун асосий шарт бўлган.

Қайд қилинишича, Нетаняҳунинг қўнғироғи унинг Вашингтонга расмий ташрифи чоғида амалга оширилган.

Америка ва Исроил расмийларининг фикрича, Қатар воситачилигининг қайта тикланиши келишувга эришиш учун муҳим ҳисобланади.

9 сентябр куни Доҳага берилган зарба ҲАМАС етакчиларига қаратилди, бироқ бунинг оқибатида асосан қуйи даражадаги амалдорлар ҳалок бўлди. Исроил расмийлари нишон «юқори мартабали террорчилар» бўлганини даъво қилмоқда, аммо операция жиддий дипломатик инқирозга олиб келганини тан олмоқда.

Бир қатор араб давлатлари Исроилнинг ҳаракатларини кескин қоралади.

Таъкидланишича, Нетаняҳунинг АҚШга ташрифи ва Трамп билан учрашуви Оқ уйнинг урушни тўхтатиш бўйича кенг қамровли келишувни ташкил этишга фаол уринишлари фонида бўлиб ўтмоқда, Трамп яқин кунларда бу ҳақда оммага эълон этишга умид қилмоқда. Исроилнинг Қатардан кечирим сўраши музокараларни давом эттириш учун йўл очадиган муҳим қадам бўлиши мумкин.