Тўқаев Қозоғистонни тинчлик музокаралари майдони сифатида таклиф қилди

Президент матбуот хизмати хабарига кўра, суҳбат чоғида Тўқаев Қозоғистон тинчлик жараёнида воситачи эмаслигини, бироқ зарурат туғилганда «яхши ният руҳида» музокаралар майдонини тақдим этишга тайёрлигини таъкидлади.

Қозоғистон президенти можарони ҳал қилиш мураккаблигини айтиб, унда ҳудудий масала «устунлик» қилаётганини ва «майдондаги» реал вазиятни ҳисобга олган ҳолда ҳар икки томондан муросага келишни талаб этишини қўшимча қилди. У барча томонларни сабр-тоқат, мослашувчанлик ва профессионаллик кўрсатишга ва тинчликка эришиш учун ечим излашни давом эттиришга чақирди.

Тўқаев, пресс-релизда айтилишича, АҚШ президентига «бир қатор халқаро ҳарбий можароларга барҳам бериш ва АҚШнинг ички салоҳиятини мустаҳкамлашда ижобий натижаларга эришиш» имконини берган Трампнинг етакчилик фазилатларини алоҳида таъкидлади.

АҚШ ноябрь ойи охирида Украинадаги можарони ҳал қилиш режасини тақдим этганди. Кейинги ой давомида можаро томонлари ва Ғарб давлатлари вакиллари унинг шартларини муҳокама қилди. Сўнгги алоқалардан бири ўтган дам олиш кунлари бўлиб ўтди: АҚШ ва Россия вакиллари 20-21 декабр кунлари учрашди; Украина делегацияси 19-21 декабр кунлари америкалик ва европалик музокарачилар билан режани муҳокама қилди.

Украина президенти Володимир Зеленскийнинг сўзларига кўра, сўнгги учрашувда АҚШ Украина, Россия ва Европа билан бевосита музокаралар ўтказишни таклиф қилган. Киев бу ташаббусни қўллаб-қувватлади.

Россия президенти Владимир Путин сентябр ойида Зеленский билан икки томонлама учрашув эҳтимолига изоҳ бериб, уни ўтказиш мумкинлигини, бироқ бунинг учун Украина раҳбари Москвага келиши кераклигини айтганди. Кейин Кремль учрашув «таслим бўлиш учун эмас, балки суҳбат учун» ўтказилишини таъкидлади.

Зеленский эса Россияга боришдан бош тортди. «Бу мен уни Киевга келиши керак, деганим билан бир хил», деб тушунтирди у.