Мачадо Оқ уйда Трампга Нобел тинчлик мукофотини “топширди”

Венесуэла мухолифати етакчиси Вашингтонда АҚШ президенти билан учрашиб, уни “Нобел тинчлик мукофоти” билан “тақдирлади”. Reuters ёзишича, Трамп Мачадонинг бу ишорасини қадрлаган ва медални ўзида қолдирмоқчи.

Фото: REUTERS

АҚШ президенти Доналд Трамп пайшанба куни, 15 январда Венесуэла мухолифати етакчиси Мария Корина Мачадо билан учрашди. Учрашув Вашингтон бу мамлакат раҳбари Николас Мадурони “қўлга олгани”дан кейин Венесуэланинг келажагини муҳокама қилиш учун ўтказилди.

Оқ уйдаги учрашувдан сўнг, ўтган йили Нобел тинчлик мукофоти лауреати бўлган Мачадо журналистларга ўзининг Нобел медалини Трампга “озодликка бўлган унинг ноёб садоқатини тан олиш белгиси сифатида” “топширган”ини айтди. Қисқа баёнотида у яна учрашув АҚШ президенти билан яхши ўтганини, унинг тарафдорлари эса Трампга таяниши мумкинлигини қўшимча қилди.

АҚШ президенти Мария Корина Мачадонинг унга ўз Нобел тинчлик мукофотини “топширган” қадамини қадрлади. “Мария менга ишларим учун Нобел тинчлик мукофотини топширди. Бу ўзаро ҳурматнинг ажойиб ишораси эди. Раҳмат, Мария!”, — деб ёзди Доналд Трамп Truth Social ижтимоий тармоғида.

Оқ уйдаги манба Reuters агентлигига АҚШ президенти “медални ўзида сақлаб қолиш ниятида” эканини билдирди.

Оқ уй матбуот котиби Кэролайн Ливиттга кўра, учрашув давомида Трамп Мачадода яқин муддатда мамлакатга раҳбарлик қилиш учун зарур қўллаб-қувватлаш етишмаслигини айтди.

9 январ куни Трамп CNN телеканали эфирида Мария Корина Мачадо билан гаплашмоқчи эканини билдирган эди. “У (Венесуэлани бошқаришнинг) айрим жиҳатларига жалб қилиниши мумкин (АҚШ Николас Мадурони қўлга олганидан кейин Венесуэлани бошқариш ҳақида гап кетяпти — таҳр.). Мен у билан гаплашишим керак. У келишни хоҳлаётгани жуда яхши, деб ўйлайман. Менинг тушунишімча, сабаб ҳам шу”, — деган у.

Нобел тинчлик мукофотини бериш учун масъул бўлган Норвегия Нобел институти 9 январ куни лауреат бу мукофотни бошқа шахсга ўтказиши мумкинлиги ҳақидаги даъволарни рад этди. “Нобел мукофоти берилиши эълон қилинганидан кейин уни қайтариб олиш, бўлиш ёки бошқаларга ўтказиш мумкин эмас. Қарор — якуний ва абадий кучда қолади”, — деб таъкидлади институт.

Бундан олдин Мария Корина Мачадо мукофотни Трампга ўтказишни ёки уни АҚШ президенти билан бўлишишни хоҳлашини айтган эди. Бу баёнот Трамп Мачадони Венесуэланинг вақтинча етакчиси этиб тайинлаш ғоясини очиқча рад этганидан кейин янграган. The Washington Post газетаси маълумотига кўра, бу рад этишга сабаб — Мачадо Трампга Нобел тинчлик мукофотини “бермагани” бўлган.