Карманадаги “Янги Ўзбекистон” массивида қурилган “дом”нинг сувоғи кўчиб тушди

Бунга янги қурилган кўп қаватли уй деворида ҳосил бўлган ёриқларга ёмғир сизиб кириши сабаб бўлган.

Навоий вилоятининг Кармана туманида “Янги Ўзбекистон” массивида қурилган кўп қаватли турар жой биносининг сувоғи кўчиб тушди. Ҳолат ёмғирли кунлардан сўнг содир бўлган.

Мазкур кўп қаватли уй таъсисчиси Шоназар Саидов бўлган “Алишер қурувчи сервис” хусусий корхонаси томонидан қурилган.

Kun.uz ҳолат юзасидан Кармана тумани ҳокимлиги матбуот хизматидан изоҳ олди. Ҳокимлик вакилининг маълум қилишича, сувоқнинг кўчиб тушишига деворда ҳосил бўлган ёриқлардан ёмғир сувининг сизиб кириши сабаб бўлган.

Қайд этилишича, ҳозирда қурувчи ташкилот томонидан ҳолатни бартараф қилиш ишлари олиб борилмоқда.