Самарқандда 8 йиллик “муаммоли уй”: қурувчи қамалди, одамлар мўъжиза кутишда давом этмоқда

Самарқанд шаҳрининг Шоҳрух кўчасида 2018 йилда бошланган кўп қаватли уй қурилиши орқали кўплаб инсонларга бошпана ваъда қилинганди. Ҳудуддаги хонадон эгалари эса иссиқ жойидан кўчирилганди. Орадан саккиз йил ўтиб ҳам уйлар битмади, қурувчи қамалди. Мижозлар ҳам, улар тўлаган пуллар ҳам қадрсизланишда давом этмоқда.

Kun.uz суриштируви шуни кўрсатдики, ушбу чала қолган лойиҳа “муаммоли уй” деб малакаланган. Ҳозирча бу муаммонинг ечими ёки аниқ режа бўйича маълумот бера оладиган масъулнинг ўзи йўқ.

Қурилиш бошланган пайтда ҳудуддаги 20 га яқин хонадон эгалари турли шартлар асосида қурувчи – “JAHON KAFOLAT STIL” хусусий корхонаси билан келишувга эришган. Кимдир уйини сотган, бошқалар янги уй олиш шарти билан ижарага чиққан, яна бир қисми эса йиллар давомида жамғарган маблағини янги квартира учун тўлаган. Бугун эса уларнинг аксарияти оғир ижтимоий ва молиявий аҳволга тушиб қолган.

Мижозлардан бири Асрор Турдиевнинг айтишича, 2018 йилда қурувчи корхона раҳбари ҳокимлик қарори билан келиб, икки йил ичида уйларни битказиб беришни ваъда қилган. Аммо бу муддат аввал чўзилган, кейин эса қурилиш бутунлай тўхтаб қолган. Ҳозиргача у оиласи, набиралари билан ижарада яшашга мажбур бўлмоқда.

Ҳовлисини қурувчига бериб, ўрнига янги уй олиш бўйича келишганлар кўпчилик. Мавжуда Рўзиқулованинг тўртта кадастрли хонадони бўлган. У учтасини янги уйга алмаштиришга, биттасини эса компенсациясини олишга келишган. Ўзи эса ўша вақтда ижарага чиқиб кетган.

“Бу вақт ичида ўзим касаллик орттириб олдим, 2023 йилда ўғлим нобуд бўлди. У жуда орзу қиларди янги уйимизга кўчиб киришни. Ҳозир аҳволим анча оғир, шу сабабли ижарадан чиқишга мажбур бўлдим. Шу ердаги эски, бузилишдан қолган гаражимизни таъмирлаб кириб олдик. Фарзандларим, набираларим билан шу шароитда яшашга мажбур бўляпмиз”, деди Мавжуда Рўзиқулова.

Умуман, бу ердан уй олиш истагида бўлганларнинг барчасининг ўз ҳикояси бор. Кимдир хорижда ишлаб топган пулини “JAHON KAFOLAT STIL” хусусий корхонаси раҳбарига нақд шаклда тўлаган. Яна кимдир шаҳар чеккасидаги уйини сотган, кимдир машиналарини сотган ва янги уй учун тўлов қилган. Деярли барча мижозлар бугун моддий-ижтимоий томондан жиддий муаммо билан тўқнаш келган.

Шу ҳудудда 35 йилдан буён яшаб келган Радик Мўминовнинг қарори эса бутунлай ноодатий. Отахон ижарада яшашга шароити бўлмагани учун чала қолган кўп қаватли уйга кўчиб кира қолган. Фақат эшик-деразаси бор ушбу хонадонда яшаётган оқсоқолнинг аҳволига ҳавас қилиб бўлмайди, албатта.

Самарқанд вилояти ҳудудий қурилиш ва уй-жой коммунал хўжалиги вакили Бекзод Хўжаёровнинг айтишича, ушбу уйларнинг қурилиши 2018 йилда бошланган. Қурилиш меъёрларига амал қилинмагани сабабли қурилиш тўхтатиб қўйилган. Қурувчининг ўзи эса айни пайтда қамоққа олинган.

Хўжаёровга кўра, бу ҳудуддаги уйлар қурилиши 11 метрдан ошмаслиги қайд этилган. 11 метрли кўп қаватли уйлар одатда уч қаватдан ошмайди. Қурувчи эса лойиҳадан ташқарига чиққан, уйни тўрт қават қилиб қурган. Қолаверса, мижозлардан ҳам кўплаб эътирозлар, мурожаатлар тушган. Натижада Самарқанд шаҳар ҳокимлиги томонидан судга даъво аризаси киритилган ва қурувчининг ўзи ҳисобидан ортиқча қаватни бузиш бўйича суд қарори қабул қилинган.

Инспекция вакили айни пайтда “JAHON KAFOLAT STIL” хусусий корхонаси раҳбари қамалиб қолгани сабабли унинг яқинлари, жумладан, отаси билан боғланганини айтмоқда. Бироқ ҳужжатларни расмийлаштириш, масалани жойига чиқиб ўрганиш бўйича қилинган таклифларни қабул қилмаган.

Самарқанд шаҳар ҳокимлиги берган маълумотга кўра, “JAHON KAFOLAT STIL” хусусий корхонаси томонидан амалга оширилган кўп қаватли уйлар қурилиши жараёнида бир қатор жиддий қонунбузилишлар аниқланган. Жумладан, қурилиш ишлари тасдиқланган лойиҳа ҳужжатлари ва шаҳарсозлик нормаларига зид равишда олиб борилгани, белгиланганидан ортиқча қаватлар қурилгани, тегишли рухсатномалар ва хулосаларсиз ишлар давом эттирилгани қайд этилган. Шу сабабли ваколатли идоралар томонидан қурилиш ишлари тўхтатилган. Ҳозирда мазкур объект муаммоли уйлар рўйхатига киритилган бўлиб, ҳолатни ҳуқуқий жиҳатдан тартибга солиш, камчиликларни бартараф этиш ва лойиҳанинг кейинги тақдирини ҳал қилиш юзасидан ўрганиш ва ечим топиш ишлари амалга оширилмоқда.

Бу ўринда “масаланинг ечими бўйича ишлар олиб борилмоқда”, деган жавобнинг ўзи етарли эмас. Ечим аниқ бўлиши керак: ҳокимлик ёки вилоят даражасидаги бирор масъул орган белгиланиб, шу каби объектлар бўйича тўлиқ реестр эълон қилиниши шарт – ким қанча пул тўлаган, қайси квартирага даъво қиляпти, барчаси рўйхатга олиниши лозим. Кейин эса икки йўлдан бири танланади: ё янги инвестор киритилиб, қурилиш аниқ муддат билан тугатилади, ёки фуқароларга келтирилган зарар тўлиқ ҳисобланиб, компенсация тўлаб берилади.

Kun.uz воқеалар ривожини кузатишда давом этади.