​​​​​​​Қирғизистонда вазир ўринбосари ва бир неча мансабдор коррупцияда гумонланиб қўлга олинди

Қирғизистон сув ресурслари, қишлоқ хўжалиги ва қайта ишлаш саноати вазири ўринбосари, ветеринария хизмати бошлиғи ва вазирликнинг иккита бўлими бошлиқлари коррупцион схема ташкил этишда гумонланиб ҳибсга олинди. Бу ҳақда мамлакат миллий хавфсизлик давлат қўмитаси хабар қилди.

Июлда қишлоқ хўжалиги вазирлиги мамлакатда гўшт нархини барқарор сақлаб туриш учун қорамол экспортига квота жорий этганди. Хабарда айтилишича, вазир ўринбосари С. Н., ветеринария хизмати раҳбари У. К. ва вазирликнинг икки бўлими бошлиқлари чорвачилик билан шуғулланмайдиган аффилланган шахсларга квоталарни ноқонуний беришни йўлга қўйишган.

"Воситачилар ноқонуний олинган квоталарни фермер ва қорамол экспорти билан шуғулланувчиларга сотиш билан шуғулланиб келишган", — дейилади хабарда.

Хабарга кўра, шу йўл билан Ўзбекистонга Жалолобод вилояти орқали 40 минг бошдан ортиқ қорамол ноқонуний тарзда экспорт қилинган.

Мазкур ҳаракатларни содир этишда гумонланганларнинг барчаси ҳибсга олинган.