«Замонавий устахона очишни режа қилганман» — "Оптимист"да дурадгор қиз ҳикояси

Ҳозир Ҳулкар отасидан ўрганган ҳунарини сингилларига ҳам ўргатяпти. Улар оилавий тарзда буюртмалар олиб, эшик-ромлар, айвонлар учун устунлар ва ёғочдан бошқа турли нарсалар ясашади.

{Yii::t(}

Ўтказиб юбориш 6s

Ўтказиб юбориш

«Кичик ёшимдан жуда кўп касбларга қизиққанман. Архитектор бўлишни мақсад қилгандим, лекин тақдир тақозоси билан дурадгорчилик йўналишини танладим. Бу ҳунарга қизиқишим 12 ёшимдан бошланган. Чунки ўша пайтда дадам уйдан устахона очган эди. Дадамнинг ишига қизиқиб, кузата бошлаганман ва биринчи марта қаламдон ясаганман. 16 ёшимдан мустақил тарзда дурадгорлик ускуналарида ишлашни бошладим», – дейди Ҳулкар.

Ҳулкарнинг дадаси Нормуҳаммад ака Эштоев билан ҳам суҳбатда бўлдик.

«Бошида буюртма асосида дурадгорчилик ишларини бажарар эдим. Вақти-соати келиб, устахона очганимда соғлигимни йўқотиб қўйдим. Ишлаш қобилиятини йўқотганимдан кейин бир муддат устахонада ишлаш учун водийдан уста олиб келдик.

Соғлигимдан жуда хавотирда эдим. Агар менга тўсатдан бирор нарса бўлса, болаларимнинг аҳволи нима бўлади, деб ташвишланардим. Шунинг учун қизим Ҳулкарга ҳунаримни ўргата бошладим. Ҳозир у жуда яхши ишлаяпти. Ясаётган нарсаларидан ҳам кўнглим тўлади.

6 нафар фарзандим бор, катта қизимни турмушга узатганман. Ҳозир уйда 7 кишимиз. Ҳулкар қизим сингиллари билан оилани ҳам тўлиқ таъминлаб келмоқда», – дейди ота.

Ҳулкар, асосан, ясаладиган нарсаларни бичиб беради. Сингиллари ва амакиваччалари унга ёрдамлашади.

«Оғир юк кўтариш керак бўлганда, қийин ишлар бўлганда амакимнинг ўғиллари ёрдам беради. Шунинг учун қийналмайман. Ҳар куни ишларимизни аввал режалаштириб, кейин бошлаймиз. Агар шундай қилинмаса, улгуриш қийин бўлади», – дейди Ҳулкар.

У эшик-ромлар учун ишлатиладиган тахталарни танлаб олишда ёғочларнинг кўзи йўқлигига, қуруқлигига эътибор бериш кераклигини айтади.

«Кўзли тахтадан ясаладиган нарсалар унчалик чиройли чиқмайди, лекин ишини яхши тушунадиган дурадгор керакли нарсани ясаш пайтида ёғочни тўғри жойлаштирса, тахталарнинг кўзлари борлиги билинмайди», – дейди у.

Ҳулкар баъзи одамлар буюртма бериш учун келганда эшик-ромларни ким ясашини сўраши, ўзи ясашини айтганида баъзилар ишонмаслиги, лекин керакли нарсаларнинг ўлчамини сўраб, режалаштириб бергач, буюртма бериб кетишларини айтди.

Ҳулкар ҳозир ўзи ишлаётган устахонани замонавий қилиб қайта қуришни режалаштирган. У кейинроқ сингиллари билан мебель ишлаб чиқарадиган алоҳида цех, тикувчилик цехи ҳам очишни режалаштирган. Отаси Нормуҳаммад ака эса қизларига ишонади.

Биз ҳам Ҳулкар ва унинг сингилларига мақсадларига эришишларини тилаймиз.

Зилола Ғайбуллаева, Kun.uz мухбири.
Тасвирчи – Нуриддин Нурсаидов.