Президент шу ҳафтада Қашқадарёга боради

Ўзбекистон президенти Шавкат Мирзиёев шу ҳафтада Қашқадарё вилоятига боради.

Kun.uz манбаси хабар беришича, давлат раҳбари 13-14 декабрь кунларида навбатдаги ташрифини амалга оширади.

Ташриф давомида жойлардаги ижтимоий-иқтисодий ислоҳотларнинг бориши, бунёдкорлик ишлари, саноат корхоналари фаолияти, транспорт ва туризм инфратузилмаси, таълим ва маданият муассасалари билан танишиши, шунингдек, жамоатчилик билан мулоқот қилиши режалаштирилган.

Ўзбекистон президенти республика ҳудудлари бўйлаб ташрифларининг навбатдаги босқичини 15-16 ноябрь кунлари Қорақалпоғистон Республикасига ташриф буюриш билан бошлаганди. Президент 29-30 ноябрь кунларида Хоразм вилоятида ҳам бўлганди.