Қорақалпоғистонда коронавирусдан даволанаётган ҳомиладор аёл фарзандли бўлди

Нукус махсус тиббиёт мажмуасида даволанаётган ҳомиладор аёл эсон-омон ўз фарзандини дунёга келтирди. Шифокорлар она ва боланинг соғлиги яхши эканини таъкидлашмоқда. Чақалоқнинг бўйи 51 сантиметр, оғирлиги эса 3,5 килограммни ташкил қилмоқда.

Вазирликнинг қўшимча қилишича, Қорақалпоғистонда 100 фуқаро – Шимолий-ғарбий ҳарбий горнизони ҳудудида жойлашган Нукус махсус тиббиёт мажмуасида станционар шароитда даволанмоқда. Шундан 13 нафар беморнинг аҳволи оғир, 2 нафар бемор ўта оғир аҳволда, 1 бемор вафот этган. Қолган 87 нафар беморнинг аҳволи ўртача. Беморлар дори-дармон ва беш маҳал овқат билан таъминланган.

Эслатиб ўтамиз, олдинроқ Қорақалпоғистонда 39 минг нафар ҳомиладор аёл нафас олиш, ҳазм қилиш аъзолари, юрак-қон томир тизими касалликлари юқорилиги боис қатъий назоратга олингани ҳақида хабар бергандик.