Экспертлар: Россияга бомбардимончиларни алмаштириш учун йиллар керак бўлади

Россия ҳарбий аэродромларига Украина учувчисиз учоқларининг ҳужуми натижасида шикастланган стратегик жанговар самолётларни алмаштириш учун Россияга йиллар керак бўлади, деб хабар берди 6 июн, жума куни Reuters агентлиги ушбу соҳадаги ғарб экспертларига таяниб. Бу йўқотишлар «Россия армиясининг ўз имкониятлари чегарасида ишлаётган асосий кучларига жиддий босим ўтказади», деди агентликка Қироллик бирлашган мудофаа тадқиқотлари институти (RUSI) эксперти Жастин Бронк.

Бомбардимончиларнинг йўқотилиши Россиянинг ядровий салоҳиятига жиддий таъсир кўрсатиши даргумон, унинг ядровий кучлари асосини қуруқликдан ва сувости кемаларидан учириладиган ракеталар ташкил этади, деб ёзади Reuters. Шу билан бирга, фойдаланишдан чиқарилган самолётлар Россия Аэрокосмик стратегик кучларининг бир қисми бўлиб, улар Россиянинг Украинага қарши уруши давомида Украина ҳудудида қанотли ракеталарни учириш учун ишлатилган, деб таъкидлайди Бронк.

Украина Хавфсизлик хизматининг (СБУ) «Паутина» операцияси пайтида шикастланган самолётларнинг аксарияти совет даврида ишлаб чиқарилган, сўнгги йилларда машиналар фақат модернизация қилинган, шунинг учун уларни тўлиқ алмаштириш даргумон, деб таъкидлайди авиация эксперти Дуглас Барри.