«Вақтни беҳуда сарфлашни истамайман» – Трамп Путин билан учрашуви қолдирилгани ҳақида

Доналд Трамп ва Владимир Путин ўртасидаги учрашувга тайёргарлик тўхтатилди, деди Оқ уй вакили анонимлик шарти билан журналистларга. У учрашув «яқин вақтлар ичида» ўтказилмаслигини қўшимча қилди.

Кейинроқ буни Трампнинг ўзи ҳам тасдиқлади. У учрашувнинг қолдирилишини «вақтни беҳуда сарфлашни истамаслиги» билан изоҳлади. «Мен фойдасиз учрашув ўтказишни истамайман. Бундан нима чиқишини кўрмагунимча вақтни беҳуда сарфлашни истамайман. Мен [уларга] тўқнашув чизиғи бўйича келишинг, ортга чекининг, уйга қайтинг ва танаффус қилинг, чунки сизлар бир-бирингизни ўлдираётган, ҳафтасига 5-7 минг аскар йўқотадиган икки мамлакатсиз дедим. Биз ҳали учрашув ҳақида қарор қабул қилмадик», – деди АҚШ президенти.

Трамп яқин икки кун ичида эҳтимолий музокаралар бўйича кейинги режалари ҳақида маълум қилишга ваъда берган.

Россия томони бир кун олдин ҳам учрашувга тайёргарлик давом этаётганини таъкидлаганди. «ОАВ бўлажак саммитга путур етказиш учун „яқин келажак“ ҳақидаги шарҳларни бузиб кўрсатмоқда», – деганди Россия президентининг махсус вакили Кирилл Дмитриев.

Россия президенти матбуот котиби Дмитрий Песков эса бугун учрашув муддати олдиндан белгиланмагани ва бу энди қилиниши керак бўлган масала эканини айтди. «Бунгача пухта тайёргарлик кўриш керак. Бунинг учун вақт керак. Ҳеч қандай янгилик йўқ», – деди Кремл вакили.

Песков икки президентнинг ҳеч бири «вақтни беҳуда сарфлашни истамаслиги», чунки улар «юқори самарадорлик билан самарали ишлашга одатлангани» ва бу самарадорлик ҳар доим тайёргарликни талаб этишини қўшимча қилган.

Венгрия бош вазири Виктор Орбан ҳам Будапештда ўтказилиши кутилаётган учрашувга тайёргарлик давом этаётганини маълум қилди. Шу билан бирга, у саммит қачон ўтказилиши ҳали аниқ эмаслигини тан олди.

Путин ва Трамп 16 октябр куни бўлиб ўтган телефон суҳбатидан кейин Будапештда учрашишга келишиб олганди. Ўшанда АҚШ президенти музокаралар икки ҳафта ичида ўтказилиши мумкинлигини ва ундан олдин контакт гуруҳлари учрашуви бўлиб ўтишини айтганди, унда АҚШ делегациясига давлат котиби Марко Рубио раҳбарлик қилиши кўзда тутилганди.

Дастлаб Трамп дастлабки учрашув жорий ҳафтада бўлиб ўтишини айтганди, бироқ душанба куни Рубио ва Лавровнинг телефон орқали мулоқотидан сўнг CNN телеканали учрашув қолдирилганини маълум қилди. Бунинг сабаби сифатида Америка манбалари Россия «максималист талаблари»дан воз кечишга тайёр эмаслигини келтиришди. ОАВ маълумотларига кўра, Москва Донецк областининг бутун ҳудуди устидан назоратни топширишни талаб қилмоқда – Трамп эса можарони фронтнинг ҳозирги чизиғида музлатишни таклиф қилган.

Будапештдаги эҳтимолий учрашув ҳақидаги хабарлар Украина президенти Володимир Зеленскийнинг Оқ уйга ташрифи арафасида пайдо бўлганди. Ушбу ташриф чоғида Украина Трампдан Tomahawk ракеталарини етказиб беришга розилик олмоқчи эди. Охир-оқибат, АҚШ президенти бунга розилик бермади – Америкадаги манбалари буни Путин билан бўлажак учрашув фонида Москва билан муносабатларни ёмонлаштирмаслик зарурати билан изоҳлаганди.