Нетаняҳу Трамп билан Эронга яна ҳужум қилиш масаласини муҳокама қилмоқчи

Бинямин Нетаняҳу Доналд Трампга янги ҳарбий операцияларда АҚШнинг эҳтимолий иштироки ёки Вашингтоннинг ёрдами бўйича вариантларни таклиф этишни режалаштирган.

Фото: Getty Images

Исроил бош вазири Бинямин Нетаняҳу АҚШ президенти Доналд Трамп билан Эронга янги зарбалар бериш имкониятини муҳокама қилишни режалаштирмоқда. Бу ҳақда ўз манбаларига таяниб NBC News телеканали хабар берди.

Манбаларнинг сўзларига кўра, Исроил бош вазири АҚШ президентига Теҳроннинг ракета дастури сабабли ўз хавотирини билдирмоқчи ва бу “тезкор жавоб ҳаракатлари”ни талаб қилишини айтмоқчи.

NBC News хабарида айтилишича, Нетаняҳу Трампга янги ҳарбий операцияларда АҚШнинг эҳтимолий иштироки ёки Вашингтоннинг ёрдами бўйича вариантларни таклиф этишни режалаштирган.

Телеканалнинг қайд этишича, 29 декабр куни Флорида штатида Нетаняҳу ва Трамп ўртасида учрашув бўлиб ўтиши кутилмоқда.

Исроил 13 июн куни Эронга қарши операция ўтказган, Эрон ҳам бунга жавоб қайтарганди. Орадан 9 кун ўтиб, АҚШ ҳам можарога қўшилди ва Эроннинг ядровий объектларига зарбалар берди. 23 июн куни Эрон АҚШнинг Қатардаги ҳарбий авиабазасига ҳужум уюштирди. Шундан сўнг Доналд Трамп Исроил ва Эрон сулҳ тузишга рози бўлганини эълон қилди.

Тайёрлаган: Дилшодбек Асқаров

#Эрон #Бинямин Нетаняҳу #Доналд Трамп