Пойтахт ва вилоят кесишадиган нуқта: “Food city” чорраҳаси қандай бўлади?

Бектемир туманидан ўтган, янги “Food city”  бозори яқинидаги катта чорраҳада кўприк ва йўл ўтказгичлар қурилиши бошланган. Мазкур лойиҳа Тошкент – Нурафшон йўли ва А373 автомобил йўли кесишмасида транспорт ўтказгич қурилиши орқали пойтахт транспорт тизимини енгиллаштириш, тирбандликларни камайтириш ҳамда ҳайдовчилар учун қулай транзит йўлак яратишни мақсад қилади. Kun.uz йирик қурилишлар кетаётган ҳудудда бўлиб, лойиҳа билан танишди.

{Yii::t(}

Ўтказиб юбориш 6s

Ўтказиб юбориш

Достонжон Шаропов “Умумий фойдаланишдаги автомобил йўлларини қуриш ва реконструкция қилиш дирекцияси” бош мутахассиси:

Мазкур объект Тошкент вилояти ва Тошкент шаҳрини боғловчи асосий чорраҳа бўлганлиги учун транспорт воситаларининг тирбандлиги жуда ҳам юқори эди. Транспорт воситаларининг тирбандлигининг олдини олиш мақсадида президент қарорига асосан дастурга киритилди ҳамда бугунги кунда объектда қурилиш-монтаж ишлари жадал равишда бошлаб юборилган. Бу объект 4Р21, 4Р2 ҳамда 4Р12 автомобил йўллари чорраҳаси бўлгани учун Сергели йўналишидан келувчи автотранспорт воситаларининг йўналиши Чорбоғ йўналишига ўтиб кетишда 450 метр масофада туннел билан иккита йўл сатҳини ўзгартириш орқали тирбандликларга ечим қилинган. Ундан Сергели томондан келадиган йўналиш, агар Чорбоғ йўналишига кетмоқчи бўлса, бемалол Чорбоғ йўналишига ҳаракатланиши мумкин ёки Тошкент вилояти Нурафшон шаҳрига борадиган йўналиш бўладиган бўлса ҳам қийналмасдан ҳеч қанақа тирбандликлар ёки йўл чироқларисиз ўз ҳаракатини давом эттираверади. Қурилиш жараёнида ҳам тирбандлик бўлмаслигига ҳаракат қиляпмиз. Яъни айни вақтда туннел қисмида қазиш ишлари ҳамда асосий таянч тиргак деворларни қуриш ишлари амалга ошириляпти. Шу боис чорраҳани умумий ёпиб вақтинчалик айланиб ўтиш йўллари орқали иккита полосадан автомобил йўллари ҳаракатланиши йўлга қўйилган.

Қурилишнинг умумий майдони қанчани ташкил этади?

– Умумий қурилиш майдони катталиги 10 гектарни ташкил этади.

Ҳозир бу ишлар неча фоизга бажарилган деб айта оламиз?

Ҳозирги кунда бу умумий ишларнинг тахминан 30-40 фоизи амалга оширилган дейиш мумкин. Шу йил бошига қадар объектимизда транспорт воситалари ҳаракатини йўлга қўйиш кўзда тутилган.

Йўл қурилиши режасида жамоат транспортлари йўналиши учун БРТ тизими ҳам ўйланганми?

Асосан битта йўналишга БРТ тизими қўйилган, Тошкент вилоятининг маркази ҳисобланган Нурафшон шаҳридан пойтахтга қатнаб ишловчи ҳар бир ҳамюртимиз бемалол ўша автобус тизимида, ҳаракатни амалга ошириши мумкин. Эски ҳолатдаги йўлимизда автотранспорт воситаларининг қатнов қисми йўналишлари сони иккита, учта бўлган бўлса, ҳозирги кунга келиб бу БРТ тизимидан ташқари алоҳида яна тўртта бўлади, тўртта-тўртта жами саккизтани ташкил этади.

Улуғбек Аҳмаджонов “Кўприкқурилиш” трести бошлиғи:

Тошкент шаҳри ва Тўйтепа шаҳрини бирлаштирувчи кесишмада ҳозир кўприк қурилиш ва туннел қурилиш ишлари олиб бориляпти. Бунда бизда туннелнинг узунлиги 450 метр бўлиб, кўприкнинг узунлиги 66 метрдан иборат. Бу ишни бажариш учун 400 минг кубдан ошиқ тупроқ ишлари бажарилади. Тупроқ ишларининг 63 фоиздан ошиғи олиб чиқилди. Ундан ташқари, аҳоли учун 2000 метрлик айланма йўллар қуриб битказилди. Ҳозирда пойдеворларга бетон олиш ишлари кетмоқда. Бу ерда жами 16 минг куб бетон ишлари ва 3000 тоннадан ошиқ арматура ишларини бажаришимиз керак. Айни вақтда 300 га яқин ходим, 200 дан ортиқ техника жалб қилинган бўлиб, ҳозирда биринчи ва иккинчи сменада ишлар жадаллик билан ташкиллаштирилган.

Шу тартибда кетадиган бўлса, режа бўйича қачон иш якунланиши керак?

Режа бўйича йилнинг охирига қадар ишларни якунлаш режалаштирилган. Энди ундан ташқари бизда тўртта пиёдалар ўтиш туннели тўрт томонда қуриляпти. Биринчиси қуриб битказилган, иккинчиси Нурафшон томонда бетон ишлари бошланди. Учинчиси Бектемир томонда, Тошкент шаҳар томонда у ҳам қазиб бошланди.

Бу ердан кам тупроқ чиқмайди. Шу қазиш ишлари натижасида ҳосил бўлган тупроқ қаерга кетади?

Бу тупроқлар яна ўзининг ёнига, қайта ташлаш учун ишлатилади. Уни биз шу қурилиш зонасининг сал четроғида йиғиб боряпмиз. Бу ердан асосан қум аралаш шағал чиқяпти, Шуни ўзимиз қайта ишлаш учун йиғиб боряпмиз ҳозир.

Олиб борилаётган ишлар натижасида бу ерда яшаётган оддий аҳолининг норозиликларига дуч келмадингизми?

Норозилик эмас, лекин бошида одамларга озгина ноқулай бўлди. Асосан пиёдаларда, автомобил-ку айланиб ўтаверади, аммо пиёдалар бироз қийналди. Ҳозирда вилоят ҳамда шаҳар ҳокимиятлари томонидан аҳолини у томондан бу томонга ўтказиш учун 20 тадан ошиқ Дамас машиналари қатнови йўлга қўйилди. Энди режа бўйича йилнинг охиригача озгина чидаб туришса, кўприк ва туннел қурилиши битгандан кейин пиёдалар ҳам, ҳайдовчилар ҳам тўхтовсиз ҳаракатланиши мумкин бўлади.