Покровск учун жангда Россия янги тактикадан фойдаланмоқда

Донецк областининг Россия қўшинлари томонидан қамал қилинаётган Покровск шаҳри Украина қаршилигининг рамзига айланди – руслар охирги бор 2022–2023 йилларда Бахмут шаҳрини олишда шу қадар жиддий муаммога дуч келганди. Покровск учун жанг 2024 йил охиридан буён давом этмоқда. 2025 йил ноябрига келиб Украина президенти Володимир Зеленский Покровскдаги мураккаб вазиятни тан олди, у яқинда берган интервюсида Украина қуролли кучлари шаҳарни ташлаб чиқиши мумкинлигини айтди. Аммо жиддий фарқлар ҳам бор – Покровск учун жангда Россия тактикани ўзгартирди ва бу ўзгариш сўнгги икки йилдаги уруш эволюциясини акс эттиради, деб ёзади украиналик ҳарбийлар ва таҳлилчилар билан суҳбатлашган CNN.

Асосий ўзгаришлардан бири узоқ масофага учувчи дронлар оммавий қўлланиши бўлди. Бу амалда фронт чизиғининг иккала томонидаги «зарба бериш зоналари»ни кенгайтирди, бу эса қўшинларнинг жанг майдонида олдинга силжишини сезиларли даражада қийинлаштирди, дея таъкидлайди CNN. Россия қўшинлари оғир зирҳли техникалардан фойдаланиш ўрнига тобора кўпроқ мопед ва квадроцикллар ёрдамида украинлар ҳудудига киришга ҳаракат қилмоқда. Украина қуролли кучларининг Покровск мудофаасида қатнашган аскарининг сўзларига кўра, уларнинг баггида ҳаракатланган россиялик ҳарбийлар билан биринчи учрашуви «ўта кутилмаган» ҳолат бўлган – аммо шу билан бирга дронларнинг доимий ҳужумлари шароитида бу мантиқий ечим эди.

Бошқа томондан, Покровскдаги вазият ярадорларни шаҳардан эвакуация қилиш деярли имконсиз экани билан мураккаблашган, дейди украиналик шифокорлар. Уларнинг сўзларига кўра, машиналар шаҳарга кўпи билан 10–15 километр масофада яқинлашиши мумкин ва бу ҳам дронлар туфайли ўта хавфли. «Оғир ярадорлар барқарорлаштириш пунктларига етиб бормаяпти. Агар кимдир ўртача оғирликдаги жароҳат олса, у менга оғир аҳволда келади, умуман етиб боришга муваффақ бўлса. Енгил жароҳатлар ўртача оғирликдаги жароҳатларга айланади», – дейди у CNN телеканалига.

Бахмут учун жангни украин ҳарбийлари «гўштқиймалагич» деб атаганди – Россия ҳарбийлари украинларнинг истеҳкомлари томон катта тўлқин бўлиб бостириб келгани, украинлар эса уларга ўт очиш орқали ўз позицияларини фош этгани туфайли. Бу икки томонда улкан йўқотишларга сабаб бўлади – аммо энди, CNN ёзганидек, Россиянинг тактикаси ўзгарди. Украина ҳарбийларига кўра, Россия ҳужум гуруҳлари сон жиҳатдан қисқарган. – Илгари шаҳар ҳудудида беш-етти кишидан бўлиб юришарди. Ҳозир кўпи билан уч нафардан. Энди уларни разведкачи дронлар ёрдамида кузатиш қийин, чунки экрандаги ҳаракатлар камроқ», – дейди CNN суҳбатдоши. Яна бир украиналик жангчи ҳам россиялик ҳарбийлар уч кишилик гуруҳ бўлиб ҳаракатланаётганини таъкидламоқда. Унинг айтишича, улар икки киши йўқ қилинса ҳам, учинчиси «барибир шаҳарга ёриб кириб, мустаҳкам ўрнашиб олиши»ни мўлжал қилади. «Бир кунда юзга яқин шундай гуруҳлар ҳужумга ўтиши мумкин», – деган у.

Вашингтондаги Урушни ўрганиш институти (ISW)нинг Defense of Europe лойиҳаси директори Мейсон Кларкнинг фикрича, Россия бундай ҳаракатларни ўзига эп кўриши мумкин, чунки тезкор ҳаракатланишга эътибор қаратилган 2022–2023 йиллардагидан фарқли ўлароқ, ҳозир «ҳужум жуда паст суръатда кечишига қарши эмас».