Европа етакчилари Украина учун “кўпмиллатли кучлар”ни ваъда қилди

Европанинг Украина бўйича иттифоқчилари Киев билан Москва ўртасида эҳтимолий тинчлик келишувини таъминлаш мақсадида “кўпмиллатли кучлар” тузиш таклифини илгари сурди. Бу ҳақда Берлинда ўтган музокараларда қатнашган Германия, Франция, Буюк Британия, Италия, Полша, Финландия, Норвегия, Швеция, Нидерландия, Дания етакчилари, шунингдек Европа Кенгаши ва Европа Комиссияси раҳбарларининг қўшма баёнотида айтилади. Баёнот Германия ҳукуматининг расмий сайтида 15 декабр, душанба куни кечқурун эълон қилинган.

Ҳужжатда шундай дейилади: “Европа бошчилик қиладиган, манфаатдор давлатлар томонидан ‘кўнгиллилар коалицияси’ доирасида шакллантирилган ва АҚШ томонидан қўллаб-қувватланадиган ‘Украина кўпмиллатли кучлари’ Украина Қуролли кучларини қайта тиклашга, Украинанинг ҳаво макони хавфсизлигини таъминлашга ва денгизда хавфсизликни сақлашга кўмаклашади, жумладан Украина ҳудудида операциялар ўтказиш йўли билан ҳам”.

Баёнотда Украинанинг тинчлик давридаги армиясининг энг юқори сони 800 минг нафар аскар бўлиши лозимлиги таъкидланади — “можароларни тийиб туриш ва Украина ҳудудини ҳимоя қилиш имконига эга бўлиш учун”. Шунингдек, халқаро иштирок билан ўт очишни тўхтатишни назорат қилиш бўйича “АҚШ бошчилигидаги мониторинг механизми”, ҳамда ўзаро деэскалация чораларини ишлаб чиқиш механизми яратилиши кераклиги қайд этилган.

Баёнотга кўра, Европа Украинага нисбатан келажакда яна қуролли ҳужум бўлса, “тинчлик ва хавфсизликни қайта тиклаш учун чоралар кўриш” бўйича юридик мажбуриятни ўз зиммасига олади. Матнда: “Бу чоралар қуролли кучлардан фойдаланиш, разведка ва моддий-техникавий ёрдам, иқтисодий ва дипломатик ҳаракатларни ўз ичига олиши мумкин”, — дейилади.