ADM Jizzakh Kia Sonet маҳаллийлаштирилишини тасдиқлади: маҳаллий ишлаб чиқарилган товар тўғрисидаги сертификат қўлга киритилди

ADM Jizzakh’да ишлаб чиқарилаётган кроссовернинг маҳаллийлаштириш даражаси 35 фоизни ташкил этмоқда. Корхона йилига 35 000 донагача Kia Sonet автомобилларини ишлаб чиқаришни режалаштирмоқда.

Ушбу натижа корхона жамоасининг автомобиль компонентларини ўзлаштириш ва ишлаб чиқаришни йўлга қўйиш, шунингдек, автомобиль маҳсулотларини етказиб берувчи мавжуд корхоналар билан яқин ҳамкорликни йўлга қўйиш бўйича олиб борган кенг қамровли ишларининг натижаси бўлди.

Бугунги кунда ADM компаниялар гуруҳи ўз кучи билан ташқи ва ички қисмлар, симлар, ўриндиқлар, кузов қисмлари, изоляция материаллари, аудио ва инфотизимлар ишлаб чиқаришни маҳаллийлаштирган. Бундан ташқари, автомобиль маҳсулотлари ишлаб чиқарувчи кўплаб маҳаллий корхоналар билан ҳамкорлик алоқалари йўлга қўйилган.

2026 йилда ADM Stamping асосида пресс ишлаб чиқаришни ва янги электродепозит цехини ишга тушириш режалаштирилган бўлиб, бу пўлат рулонларни кесишдан тайёр автомобилнинг якуний йиғувигача бўлган автомобиль ишлаб чиқаришнинг тўлиқ циклини ўзлаштириш имконини беради.

Сертификатнинг мавжудлиги сотув имкониятларини кенгайтиради, жумладан, давлат компаниялари ва ташкилотлари томонидан маҳаллий ишлаб чиқарилган маҳсулотларга қўйиладиган талаблар доирасида харид қилиш имкониятини очади.

Маълумот учун: маҳаллий ишлаб чиқарилган товар тўғрисидаги сертификат Вазирлар Маҳкамасининг 2024 йил 28 октябрдаги 712-сон қарори доирасида берилади ва автомобильнинг маҳаллийлаштириш талаблари ҳамда миллий стандартларга мувофиқлигини тасдиқлайди.

Сайт | Электрон почта

ADM: Instagram | Facebook | YouTube | X | LinkedIn

ADM Jizzakh: Telegram | Instagram | Facebook | YouTube

Реклама ҳуқуқи асосида