Биржада пропан нархи ошмоқда

Суюлтирилган газнинг улгуржи нархи йил бошидан бери қарийб 15 фоизга, декабр ойи бошидан буён эса 19 фоизга кўтарилди.

Фото: Яндекс хариталар

2026 йилнинг дастлабки 4 биржа кунида пропан нархи 14,7 фоизга кўтарилди. Kun.uz эътибор қаратган Товар-хомашё биржаси маълумотлари шундан дарак бермоқда.

Ўтган йилнинг сўнгги иш куни – 30 декабрдаги савдоларда суюлтирилган газнинг 1 тоннаси учун нарх ўртача 8 млн 87 минг сўмни ташкил этган.

5-8 январ кунлари эса нарх қарийб 1,2 млн сўмга ёки 14,7 фоизга кўтарилиб, 9 млн 277 минг сўмгача етди.

Шу 4 кун давомида сотилган маҳсулот ҳажми кунига ўртача 2 минг тоннага тенг бўлди. Таққослаш учун, 2025 йил сўнггидаги охирги 4 биржа кунида кунига ўртача 2390 тоннадан пропан сотуви амалга оширилган.

2025 йил 1-4 декабр кунлари (душанба–пайшанба) биржада пропаннинг ўртача нархи тоннасига 7 млн 337 минг сўмни ташкил этган бўлса, 2026 йил 5-8 январ кунлари (душанба–пайшанба) ўртача нарх бундан 18,8 фоизга кўтарилиб, 8 млн 716 минг сўмни ташкил этди.