Исроилдаги ОТМда таҳсил олаётган талабалар Ўзбекистонга қайтарилди

Холон технология институтида таҳсил олаётган ўзбекистонлик талабалар ватанга қайтарилди. Улар ўқишни онлайн давом эттиради.

Фото: Ўзбекистоннинг Исроилдаги элчихонаси

15 октябр куни Исроилнинг Холон технология институтида таҳсил олаётган ўзбекистонлик талабалар Тошкентга учиб кетди. Бу ҳақда Ўзбекистоннинг Исроилдаги элчихонаси маълум қилди.

Тел-Авив жанубидаги Холон шаҳрида жойлашган институт билан талабаларнинг Ўзбекистонда ўқишини онлайн форматда давом эттириш бўйича келишувга эришилди, дейилади хабарда.

Элчихона талабаларни ватанга жўнатишда Холон технология институти, Ўзбекистон Миллий университети, Бухоро ва Самарқанд давлат университетлари, шунингдек, Uzbekistan Airways ваколатхонасининг ёрдамини таъкидлади.

#Исроил #ОТМ

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.