Трамп Мексикадаги наркокартелларга АҚШ зарбаларини истисно этмади

АҚШ президенти Доналд Трамп Мексикани, унинг таъкидлашича, наркокартелларга қарши курашнинг уддасидан чиқа олмаётганликда айблаб, шу муносабат билан АҚШ томонидан бу давлат ҳудудига зарбалар берилишини мумкин деб ҳисоблашини билдирди.

«Мен наркотикларни тўхтатиш учун Мексика ҳудудига зарба берган бўлармидим? Бу мени қониқтиради. Биз наркотикларни тўхтатиш учун зарур бўлган ҳамма ишни қиламиз», – деди Трамп 17 ноябр куни Оқ уйда журналистлар саволига жавоб бериб. Ундан АҚШ Мексика ҳудудида наркотрафикка қарши операция ўтказишни маъқуллайдими, деб сўрашди.

«Мен буни қилиш ниятидаман, демаяпман, бироқ бундай қилиш билан фахрланган бўламан. Чунки шундай қилиш орқали биз миллионлаб одамларнинг ҳаётини сақлаб қоламиз», – деди Трамп.

Август ойидан бери Вашингтон Кариб ҳавзасида катта ҳарбий мавжудликни сақлаб келмоқда, шу жумладан ҳарбий кемаларни жойлаштирган ҳолда. Расмий баёнотларга кўра, бу қадам Лотин Америкасидаги қатор мамлакатларда наркосавдогарларга қарши курашиш учун қилинган.

Трампнинг таъкидлашича, Америка ҳарбий мавжудлигининг кучайтирилиши фонида таранглик ортаётгани боис у Венесуэла раҳбари Николас Мадуро билан гаплашишга тайёр.

«Маълум бир пайтда мен у билан гаплашаман», – деди Трамп журналистларга. Шу билан бирга, у венесуэлалик раҳбар "Қўшма Штатларга яхши муносабатда эмас"лигини қўшимча қилди.

Ундан АҚШ қўшинлари Венесуэла ҳудудида пайдо бўлиши мумкинми, деб сўрашганда, Трамп: «Мен буни истисно қилмайман, мен ҳеч нарсани истисно қилмайман. Биз фақат Венесуэла ҳақида қайғуришимиз керак. Улар минглаб, юз минглаб одамларни, жумладан турмалардан чиққанларни мамлакaтимизга ташлаб юборди», – деб жавоб берди.

Бир неча соат ўтиб, Мадуро ўзининг ҳафталик теледастури эфирида АҚШда "Венесуэла билан гаплашишни истаган ҳар қандай одам" билан "юзма-юз" суҳбатга тайёрлигини маълум қилди.

Ҳозирги пайтда АҚШ денгиз пиёда қўшинлари контингенти Тринидад ва Тобагода ҳарбий машқлар ўтказмоқда. Бу – Вашингтон ва Венесуэла қирғоғидан тахминан 10 км узоқликда жойлашган кичик инглиззабон архипелаг ўртасида бир ойдан камроқ вақт ичида ўтказилаётган иккинчи шунга ўхшаш манёврлардир.

Бироқ Тринидад ва Тобаго раҳбари душанба куни унинг давлати ўз ҳудудидан Венесуэлага зарба бериш учун фойдаланишга йўл қўймаслигини, қолаверса, АҚШ ҳеч қачон бундай нарса сўрамаганини билдирди.

"Қўшма Штатлар ҳеч қачон Венесуэла халқига зарба бериш учун ҳудудимиздан фойдаланишга рухсат сўрамаган", – деди бош вазир Камла Персад-Биссессар AFP агентлигига.

«Тринидад ва Тобаго Венесуэла халқига зарар етказиши мумкин бўлган ҳеч қандай ҳаракатларда иштирок этмайди», – деб қўшимча қилди у ва Вашингтон ҳамда Каракас ўз ихтилофини мулоқот йўли билан ҳал қилиши кераклигини таъкидлади.

Венесуэла Вашингтонни Каракасда ҳокимиятни алмаштиришга интилаётганликда айблаб келмоқда. Бу айбловлар АҚШнинг минтақада, жумладан авиаташувчилар гуруҳи, ҳарбий кемалар ва бир неча қирувчиларни ўз ичига олган ҳарбий мавжудликни кучайтириши ортидан янграмоқда.

Ўз навбатида, Вашингтон Мадурони "террористик" наркокартелга раҳбарлик қилишда айбламоқда. Мадуро эса бу айбловларни рад этади.

Сентябр ойидан бери Америка қўшинлари халқаро сувларда наркотик ташишда айбланган кемаларга ҳаводан зарбалар бериши натижасида камида 83 киши ҳалок бўлган.