Дубайда меҳмонхонадаги ёнғинга қарамасдан байрам салютлари отилди

Дубайга янги 2016 йил кириб келган вақтда (Тошкентдан 2 соат кейин) аввалдан белгиланганидек байрамона мушакбозлик бўлиб ўтди. Бунга Дубай шаҳри марказидаги меҳмонхоналардан бирида рўй берган ёнғин халал бермади.

Янги йил яқинлашаётган соатларда шаҳарнинг сайёҳлик ҳудудидаги "Бурж ул Араб" биноси яқинида жойлашган Address Downtown меҳмонхонасида ёнғин содир бўлди. Ёнғин 80 метр баландликдаги, 63 қаватли меҳмонхонанинг 20 қаватида юз берган.

Ҳодиса туфайли 15 киши жароҳатланган ва 1 киши ҳалок бўлган.

Дубай амирлиги фуқаролик мудофааси департаменти раҳбари, генерал-майор Рашид ал-Матруший бу ёнғинга қарамасдан байрам тадбирлари давом этишини билдирганди.

Шаҳарга Янги йил кириб келган соатларда осмонга улкан салютлар отилган ва катта мушакбозлик шоу уюштирилган. Ташкилотчилар бу тадбирлар учун 1,6 тонна миқдоридаги пиротехника воситалари ва 400 мингта LED-чироқларидан фойдаланилган.