«Реал» сафарда «Валенсия» билан дуранг ўйнади

Мадриднинг "Реал" клуби Испания чемпионати 18-турида "Валенсия"га қарши кечган баҳсда ғалаба қозонишнинг уддасидан чиқа олмади.

Лекин мадридликлар бир киши кам бўлиб қолган ҳолда 2:2 ҳисобидаги дурангга эриша олишди.

"Реал" сафида голлар Карим Бензема (16) ва Гарет Бэйл (82) ҳисобига ёзилган. Мезбонлар сафида эса Даниэль Парехо (45) ва Пако Алькасер (83) гол уришган.

Учрашувнинг 68-дақиқасида "Реал" сафида Ковачич майдондан четлатилган ва жамоа битта кам бўлиб ўйинни якунлашга мажбур бўлган.

Шу тариқа "Реал" бир очкога эга бўлди ва жадвалда "Барселона"дан ўтиб кетиш имконини йўққа чиқарди. Мадридликлар 37 очко билан учинчи ўринда, "Барселона" эса 1 ўйин кам ўтказгани ҳолда 39 очко билан иккинчи ўринда. Турнир жадвалида 41 очкога эга бўлган "Атлетико" пешқадамлик қилмоқда. "Валенсия" эса 23 очко билан 10-поғонага жойлашган.

Испания чемпионати, 18 тур
"Валенсия" – "Реал Мадрид" 2:2 (1:1, 1:1)
Голлар: 0:1 – 16 Бензема, 1:1 – 45, пенальти Парехо, 1:2 – 82 Бэйл, 2:2 – 83 Пако Алькасер.
"Валенсия" – Доменек, Адерлан Сантос, Абденнур, Орбан (Родриго, 80), Жоау Канселу, Данило, Парехо (Негредо, 84), де Пауль (Хави Фуэго, 87), Андре Гомеш, Барраган, Пако Алькасер.
"Реал Мадрид" – Навас, Пепе, Марсело, Данило, Рамос, Модрич, Кроос, Ковачич, Бэйл, Роналду, Бензема (Васкес, 67).
Огоҳлантиришлар: Пепе (45), Барраган (57).
Четлатишлар: Ковачич (68).