Трамп: АҚШ Яқин Шарқда фаоллашмаганида, дунё тинчроқ бўлар эди

Республикачилар партиясидан АҚШ президентлигига номзод Дональд Трамп CBS телеканалига берган интервьюсида агарда АҚШ сўнгги 13 йил давомида Яқин Шарқ ва Шимолий Африка ишларига аралашавермаганида, дунё ҳозиргидан кўра тинчроқ бўлиши мумкинлигини маълум қилди.

“Агарда биз Яқин Шарқда ҳеч нарса қилмаганимизда, ҳозирда тинчроқ дунёда яшаётган бўлардик. Мана, Саддам Ҳусайндан қутулдик. Мен у яхши одам бўлган, демайман. У ёмон эди. Бироқ биз нимага эришдик – янада ёмонроғига”, - деди у.

Унинг сўзларига кўра, Вашингтоннинг бошқа хатолари ҳам бор: Ливияга нисбатан муносабатида, натижада Муаммар Каддафий қулатилди ва ўлдирилди; Сурия инқирозига муносабат бўйича амалга оширилган сиёсат.

“Буларнинг барчаси ИШИД (нинг пайдо бўлиши)га олиб келди. Буларнинг барчаси миграцияга олиб келди. Буларнинг барчаси одамларнинг оммавий қатл этилиши ва вайронагарчиликларга олиб келди”, - дея қўшимча қилди миллиардер.