ОАВ: Туркия соҳилларидан чўкиб ҳалок бўлган ўнлаб қочқинларнинг жасадлари топилди

Туркия ҳукумати 5 январь куни Айвали (Беҳили) шаҳри яқинидаги қирғоқдан қайиқ ҳалокати туфайли сувга чўкиб ҳалок бўлган ўнлаб кишиларнинг жасадини аниқлади. Бу ҳақда Hurriyet Daily News газетаси хабар берди.

Маълум қилинишича, Туркиянинг Измир шаҳри портидан Грециянинг Лесбос оролига қараб йўлга чиққан 22 киши минган қайиқ довулга дуч келиб, ағдарилиб кетган. Туркиялик ҳуқуқни муҳофаза қилиш органлари қидирув амалиёти ўтказиб, ҳалокатга учраганларнинг таналарини топишган.

Қайд этиш керакки, кейинги бир йилда Яқин Шарқдан чиққан қочқинларнинг аксар қисми Туркия орқали Грецияга ўтишмоқда ва кейин Европанинг бошқа мамлакатларига (асосан Германияга) йўл олишмоқда. Миграция бўйича халқаро ташкилот маълумотига кўра, 2015 йилда 580 мингдан ортиқ ноқонуний муҳожир денгиз йўли орқали Европага ўтган. Греция йил бошидан буён 441 мингдан ортиқ муҳожирни "кутиб олган".