CSM: Эрон ва Саудиянинг тўқнашуви АҚШ учун оғир зарба бўлади

АҚШ Яқин Шарқ сиёсатини сусайтириб, минтақадан чиқиб кетишни режалаштираётган паллада бу ерда юзага келаётган етакчилик вакуумини тўлдириш учун Эрон ва Саудия Арабистони кураш бошлаб юборди. Бу ҳақда Christian Science Monitor нашри ёзмоқда.

Газета саудиялик шиа илоҳиётчиси Нимр ан-Нимрнинг қатл қилиниши туфайли икки томон муросасиз баҳсларга киришиб кетганини эслатиб ўтди.

Нашр билан суҳбат қурган сиёсатшунос Саймон Хендерсоннинг фикрича, АҚШ президентининг икки асосий ташқи сиёсий мақсади бўлмиш Сурия инқирозини бартараф қилиш ва Эрон ядровий дастури бўйича келишув имплементациясига Риёд ва Теҳрон ўртасидаги ихтилоф туфайли жиддий зарба берилиши мумкин.

"Обама маъмурияти ҳар доим минтақавий сиёсатдаги иштирокини камайтириб, ўз диққатини бошқа ерга йўналтиришни мўлжал қилиб келган эди, аммо бу ёндашув акс натижа берди: икки геосиёсий рақиб ўртасидаги кескинликнинг ортиши АҚШ манфаатларига жиддий зарар келтирмоқда ", — хулоса қилди мутахассис.

Унинг қўшимча қилиши, Эрон билан келишув ижроси учун АҚШ Теҳронда Саудия элчихонасига уюштирилган ҳужумни “кўрмай” қолиши мумкин, мана шу ҳолат Риёднинг норозилигига сабаб бўлмоқда. Бу, ўз навбатида, минтақада Эроннинг роли ошиши демакдир, бу ҳолатда Саудия АҚШга бўлган ишончини йўқотади ва мустақил ҳаракат қила бошлайди.