Назарбоев: Қозоғистонда коррупцияга қарши кураш кун сайин тизимлашиб боради

Қозоғистон ҳукумати коррупцияга қарши кураш чораларини борган сайин изчиллаштириб, бир тизимга солиб боради. Бу ҳақда республика президенти Нурсултон Назарбоев маълумот берди.

Бугун расмий сайтида чоп этилган “Миллат режаси – Қозоғистон орзуси сари йўл” номли мақоласида Назарбоев коррупцияга қарши кураш жиддий тус олишини алоҳида қайд қилиб ўтди.

Унинг таъкидлашича, кураш учун асос сифатида давлат аппарати самарадорлигини ошириш хизмат қилади. Бунинг учун мамлакатда давлат хизмати тўғрисида янги қонун қабул қилинди; унинг талабларига мувофиқ, давлат хизмати бўйича вазирлик ташкил этилиб, унинг структурасига коррупцияга қарши кураш бўйича миллий бюро киритилди.