Oculus Rift виртуал реаллик кўзойнаклари кутилганидан икки баробар қимматроқ эканлиги маълум бўлди

Facebook компаниясига тегишли Oculus VR компанияси Oculus Rift виртуал реаллик кўзойнакларининг ҳаммабоп версияси учун буюртма олишни бошлади, деб ёзмоқда Los Angeles Times нашри. Тизим кўзойнак, бошқарув пульти, гарнитура ва Xbox One учун контроллёрни ўз ичига олган.

Таъкидланишича, кўзойнак учун белгиланган 599 долларлик нарх кутилганидан икки баробар қимматроқ бўлиб чиқди. Буюртма қилинган кўзойнаклар март ойидан кейин етказиб берила бошланади.

Sony (PlayStation VR ёки Project Morpheus) ва HTC (Vive, Valve билан биргаликда) компанияларининг шундай тизимларининг неча пул туриши ҳозирча номаълумлигича қолмоқда.

Oculus Rift қимматлигидан ташқари, кучсизроқ компьютерларда ишламайди. Кўзойнак яратувчилари компьютерга қўйиладиган талаблар қаторида камида NVIDIA GTX 970 видеокартаси, Intel i5-4590 процессори ва 8 Гб тезкор хотира бўлиши кераклигини кўрсатишмоқда.

Oculus VR вакилларининг айтишича, Oculus VR ва унга мос бўлган компьютердан иборат тизим февралда 1499 доллардан сотувга чиқарилади.