ОАВ: Ироқда ИШИД қўмондонларидан бири жиддий жароҳатланди

Ироқнинг Анбар вилоятида амалга оширилган авиазарбалар натижасида ИШИДнинг йирик ҳарбий қўмондонларидан бири бўлмиш Абу Муҳаммад ал-Аднаний жиддий жароҳат олган.

"Бу маълумот тасдиқланган. Анбар вилоятининг Барвана туманида ўтказилган ҳаво амалиёти вақтида ИШИД қўмондонларидан бири, ташкилотнинг расмий вакили Абу Муҳаммад ал-Аднаний жароҳатланган", дея ироқлик ҳарбийнинг сўзидан иқтибос келтиради Рейтер агентлиги.

Бундан олдинроқ, экспертлар Парижда содир этилган терактлар ташкилотчиси, Сен-Денидаги амалиёт вақтида ўлдирилган шахс Абдулҳамид Абауд эмас, Абу Муҳаммад ал-Аднаний бўлгани ҳақида тахминлар билдиришганди.

Буюк Британиянинг Sunday Times нашрида ёзилишича, у Ироқдаги урушда АҚШга қарши жанг қилган ва халқаро миқёсдаги террорчилар рўйхатида қайд этилган. Абу Муҳаммад ал-Аднаний Франция, Буюк Британия, Германия, Италия ва Бельгиядаги террорчи гуруҳлар фаолиятига жавобгар шахс ҳисобланиши айтилган.