Янгиланган Ford Mondeo фотосуратлари пайдо бўлди

Motor1.com сайти ихтиёрига камуфляжсиз суратга олинган янгиланган Ford Fusion седанининг суратлари келиб тушди. Моделнинг Европадаги версияси Mondeo деб аталиб, унинг янгиланган версияси Детройдаги моторшоу доирасида 11 январда илк бор намойиш қилиниши керак.

Суратларга кўра, Fusion’нинг радиатор панжараси, бош ёруғлик фаралари ва олди бампери ўзгаради. Олд бампердаги ҳаво тўплагичларнинг шакли ўзгача кўриниш олади. Кузовнинг орқа қисмида бампер ва чироқлар ҳам ўзгаради ҳамда қўшимча хромланган элементлар пайдо бўлади.

Автомобиль салонида Blackberry компаниясининг QNX операцион тизими негизида ишловчи янги SYNC 3 мультимедиа мажмуаси пайдо бўлади. “Форд” тизимнинг интерфейси, сенсор экранга босишга жавоб беришни яхшилайди, овозли бошқарув функциясини тўлиқ янгилайди.

Суратларда автомобилнинг чиқариш тизимининг 4 та патрубкаси ва орқа спойлерга эга Sport версияси тасвирланган. Автомобилнинг бундай варианти EcoBoost двигателлар оиласига тегишли 2,7 литрли, 6 цилиндрли, 315 от кучига эриша оладиган двигатель билан жиҳозланади.

Шунингдек, автомобилнинг моторлар оиласига 1,5 ва 2,0 литрли, 4 цилиндрли, 181 ва 240 от кучига эга ҳамда 6 поғонали “автомат” узатмалар қутиси билан биргаликда ишловчи двигателлар киради. Бундан ташқари, АҚШга автомобилнинг 141 от кучига эга, 2литрли бензин мотори ва вариатор негизидаги гибридли модификацияси ҳам чиқарилади.