Эрон Саудияни “ақл овози”га қулоқ тутишга чақирди

Эрон ташқи ишлар вазири Муҳаммад Жавод Зариф БМТ бош котиби, Ислом ҳамкорлиги ташкилоти бош котиби ҳамда БМТга аъзо бир қатор давлатлар ташқи ишлар вазирларига мактублар йўллади. Бу ҳақда IRNA агентлиги хабар бермоқда.

Зариф ушбу мактубларда Саудия Арабистони ва Эрон ўртасида охирги кунларда юзага келган кескинлик ҳақида сўз юритган.

“Саудия Арабистони экстремист ва террорчиларни қўллаб-қувватлашда, диний нафратни чуқурлаштиришга йўналтирилган одимларни отишда давом этиши, ёки биродарлик, қўшничилик йўлини танлаши ва минтақавий барқарорликни таъминлашда конструктив роль ўйнаши мумкин. Эрон Саудия Арабистони ақл овозига қулоқ тутишидан умид қилади”, - дейилади мактубда.