Тунисда терактлар туфайли меҳмонхоналарнинг 50 фоизи ёпилди

Тунисда ишлаб турган 570 меҳмонхонанинг 270дан ортиғи туристик соҳа инқирози туфайли ёпилиб кетди. Бу ҳақда 10 январь куни Kapitalis нашри хабар берди.

Тунис профессионал туризм уюшмаси раиси Хусом бин Азизнинг фикрича, 2016 йил бошида ёпилган меҳмонхоналар сони янада кўпайиши мумкин, негаки йилнинг биринчи чораги анъанага кўра туристик соҳа учун “қуруқ” давр бўлади.

Тунис ҳудудида ўтган йили содир этилган бир қанча терактлар оқибатида мамлакатга ташриф буюрувчи сайёҳлар сони кескин камайиб кетди. Терактларда айнан чет элликлар кўп бора нишон сифатида танлаб олингани ҳам бу борада муҳим омил бўлди.

Энг катта зарарни Испаниянинг RIU Hotels & Resorts тармоғи кўрди: унга тегишли Imperial Marhaba меҳмонхонаси ҳовлисида 2015 йилнинг 26 июнида террорчилик акти содир этилди. Ўшанда террорчилар пляжга бостириб кириб, турли давлатлар фуқаролари бўлган 38 кишини ўлдиришган эди.

Шунингдек, Жарбадаги Франциянинг Club Med тармоғига тегишли Djerba la Douce курорт комплекси ҳамда Франциянинг Marmara тармоғига тегишли Dar Djerba ва Palm Beach Djerba меҳмонхоналари ёпилиб кетди.