Америкалик доцент мусулмонча исми сабаб онлайн компьютер ўйинига кира олмади

Флорида штатидаги коллежлардан бирининг мусулмон доценти Муҳаммад Зохир Хон ўзининг исми сабабли кўп фойдаланувчили онлайн компьютер ўйини Paragon’да рўйхатдан ўта олмади. Бу ҳақда NBC News маълум қилди.

Зохир Хон ўйин дастурига ўзи ҳақидаги маълумотларни киритгандан кейин дастур блоклаш ҳақида хабар чиқарган: унда Зохир Хон исми Хорижий активларни назорат қилиш бошқармаси томонидан қора рўйхатга киритилгани айтилган.

Дастлаб олим бу хакерларнинг иши бўлса керак, деб ўйлаган, бироқ тез орада унинг исми ҳақиқатан ҳам террорчилар ва гиёҳвандфурушларни АҚШ фуқаролари билан битимлар тузишдан маҳрум қилишга мўлжалланган қора рўйхатга киритилгани аниқланган. Рўйхатга албатта олимнинг ўзи эмас, балки унинг покистонлик адаши киритилган бўлган.

Paragon ўйинини ишлаб чиққан Epic Games компанияси Зохир Хондан бу англашилмовчилик учун узр сўраган ва муаммони ўйин дастурига пуллик кириш кодининг мукаммал эмаслиги билан тушунтирган ҳамда бу муаммо яқин орада ҳал қилинишини айтган. Бироқ олим бундай жавобдан қониқмаган: унинг айтишича, у кўплаб компьютер ўйинларида ўйнайди ва улардан ҳеч бирида аввал бундай муаммога дуч келмаган.

Мутахассисларнинг фикрича, муаммо кенгроқ бўлиб, компьютер ўйинларида рўйхатдан ўтиш билангина чекланиб қолмайди. Хорижий активларни назорат қилиш бошқармаси қора рўйхатига 6 мингга яқин киши киритилган бўлиб, улардан баъзилари ҳақида жуда кам маълумот мавжуд, яъни уларнинг фақатгина исми ва фамилиясигина маълум. Улар орасида АҚШга Лотин Америкаси ва мусулмон давлатларидан келганлар орасида кенг тарқалган исмларга эгалари ҳам бор. Ўйин ишлаб чиқувчилари қонунга тўлиқ бўйсуниб, ўйиндан рўйхатдан ўтадиганларнинг исмларини қора рўйхатдаги исмлар билан солиштирадиган бўлсалар, унда янги муаммолар пайдо бўлиши мумкин.

Paragon ўзида реал вақтда стратегия ва ролли ўйинни уйғунлаштирган ўйин бўлиб, бундай жанрдаги ўйинларда ўйинчиларнинг икки гуруҳи бир-бири билан беллашади.