Швейцария Эрондан санкцияларни бекор қилди

Швейцария 17 январь куни Эронга нисбатан жорий этилган санкцияларни олиб ташлади. Бу ҳақда мамлакат Федерал кенгаши хабар қилди.

“2015 йилнинг 21 октябрида эълон қилинганидек, Швейцария Эронга қарши санкцияларни БМТ ва ЕИ билан бир қаторда олиб ташлайди. Федерал кенгаш Эрон Ислом Республикасига муносабатни қайта кўриб чиқди. Янги қонунчилик 17 январь куни 12.00да кучга кирди”, - дейилади хабарда.

Бундан аввалроқ эса Австралия БМТ Хавфсизлик кенгаши МАГАТЭ ҳисоботини қўлга олиши билан ўзи жорий этган санкцияларни олиб ташлашини маълум қилди.

Эслатиб ўтамиз, 16 январь куни МАГАТЭ раҳбари Юкия Амано Эроннинг атом бўйича келишувни имплементация қилиш (амалга ошириш) учун барча талабларни бажарганини тасдиқлади.

Санкциялар бекор қилинганидан сўнг Эрон хориждаги музлатиб қўйилган ҳисоб рақамларидан қайтадан фойдаланиш имконига эга бўлади. Америка молия вазирлигининг маълумотига кўра, Эроннинг қарийб 50 миллиард доллар маблағи музлатилган.

Шунингдек, Эрон нефть экспорти ҳажмини кунига 500 минг баррелга қадар оширади.