Давлат органлари ва ННТлар коррупцияга қарши кураш масаласини муҳокама қилди

Бош прокуратура ва Ўзбекистон Адлия вазирлиги 16 январь куни коррупцияга қарши кураш соҳасида чора-тадбирларни амалга оширишга бағишланган идоралараро йиғилиш бўлиб ўтди.

Бош прокуратура матбуот хизмати хабарига кўра, йиғилишда давлат органлари, илмий-тадқиқот муассасалари ва нодавлат нотижорат ташкилотлар раҳбарлари иштирок этган.
Қарийб 70 ташкилот вакиллари мазкур соҳада 2015 йилда амалга оширилган режавий комплекс чора-тадбирлар натижаларини муҳокама қилишди.

Қайд этиш жоизки, бу биринчи аксилкоррупцион ҳаракатлар режаси бўлиб, турли муассаса ва ташкилотлар иштирокида жамоатчилик ҳамда илмий доиралар фикри инобатга олинган ҳолда ишлаб чиқилди.

Хусусан, давлат ташкилотлари фаолиятининг очиқлигини ошириш, ижтимоий ҳамкорлик асосларини кучайтириш, порахўрлик ва бошқа ҳуқуқбузарликлар профилактикаси, давлат хизматчилари хулқ-атворининг этика стандартларини ишлаб чиқиш сингари масалалар бўйича ташкилий-ҳуқуқий асосларни яратиш қайд этилди. Йиғилиш иштирокчилари 2016-2017 йилларда порахўрликка қарши кураш бўйича истиқболдаги комплекс чораларни ҳам кўриб чиқишди.