Мэрайя Кэри миллиардерга турмушга чиқади

Таниқли хонанда Мэрайя Кэри австралиялик миллиардер Жеймс Пакер билан унаштирилди. People журналининг ёзишича, бизнесмен 21 январь куни Нью-Йоркда Кэри оила қуришни таклиф қилган.

2015 йили хонанда интервьюларидан бирида Пакер билан “Геракл” фильмининг премьерасида танишганини айтганди. Ўтган йилнинг декабрида жуфтлик биринчи марта “Стажёр” фильмининг тақдимот маросимида, Нью-Йоркда биргаликда жамоатчилик олдида пайдо бўлди.

Мэрайя Кэри муқаддам икки марта никоҳда бўлган: у мусиқий магнат Томми Моттола ва актёр Ник Кэннон билан оила қурган. Кэннондан унинг икки фарзанди бор. Ўз навбатида, Жеймс Пакер собиқ рафиқаси Эрика Бэкстердан уч фарзанд кўрган.