Matiz Россияда ҳамон энг арзон машина бўлиб қолмоқда

“Российская газета” газетаси Россияда 2016 йилнинг январь ойидаги энг арзон машиналар рейтингини тузди.

Экспертлар тахмин қилганидек, 2016 йил бошида кўпчилик автомобилсозлик компаниялари ўз автомобилларига нархларни кўтаришди – кимдир буни валюта курси деб, кимдир “Евро-5” экологик талабларига жавоб берувчи янги такомиллашган двигателларни қўллагани деб, кимдир эса ҳеч қандай сабабсиз амалга оширди.

“Автостат” агентлиги таҳлилчиларининг ҳисоб-китобларига кўра, январда Россия бозорида фаолият юритувчи 30та автомобилсозлик компанияси, яъни аксарият қисми ўз маҳсулотларига нархларни кўтарди. Бироқ Fiat, Ford, Honda, SsangYong, Suzuki, Acura, Chrysler, Mercedes-Benz, Mini, Porsche ва Smart, УАЗ, Хитойнинг Brilliance, FAW, Great Wall ва Haima, Россия бозорини тарк этаётган Opel ҳамда Daewoo ва Ravon компаниялари ўз автомобилларининг нархини аввалгидек нархларда қолдирди.

Рейтингнинг илк поғонасини ҳамон кичик литражли Matiz машинаси эгалламоқда. Бу машина ҳам Daewoo, ҳам Ravon брендлари остида сотилмоқда ва унинг базавий версияси 314 000 рублдан (3925 доллар) таклиф қилинмоқда. Унинг орқа ойна тозалагичга эга версияси 340 минг рубль (4250 доллар), кондиционерли версияси 370 минг рубль (4625 доллар), руль гидрокучайтиргичи ва олд электр ойна кўтаргичга эга версияси эса 380 минг рублдан (4750 доллар) сотилмоқда.

Lada Granta седани

Рейтингнинг кейинги ўринларида Lifan компаниясининг Smily хэтчбеки (2-ўрин) ва Smily New (4-ўрин) модели эгалламоқда, улар мос равишда 319 900 ва 364 900 рублдан таклиф қилинмоқда. Smily’нинг кондиционер ва орқа парктроникка эга версияси 349 900 рублдан таклиф қилинмоқда.

Lifan Smily

Россияда сотилаётган энг арзон седан Lifan Celliya бўлди (3-ўрин), унинг 2014 йилда ишлаб чиқарилган нусхаси 364 900 рублдан таклиф қилинмоқда. Машинанинг Luxury версияси 389 900 рублдан сотилмоқда.

5-ўринни Россиянинг Lada Granta седани эгалламоқда, у 368 900 рублдан сотилмоқда. 6-ўринни 388 500 рублдан таклиф қилинаётган Lada Granta лифтбеки, 7-ўринни Geely GC6 седани (2014 йилги нусхаси 389 000 рубль), 8-ўринни Chery Bonus (389 999 рубль), 9-ўринни Renault Sandero хэтчбеки (399 000 рубль) ва 10-ўринни Chery Very (399 999 рубль) эгалламоқда.

Lifan Celliya

Умуман олганда, нархларнинг ўзгаришига қарамасдан, бозорнинг ҳамёнбоп автомобиллар сегментида вазият анча барқарор қолмоқда. Энг арзон машиналарнинг етакчи ўнтаси 400 минг рубллик чегарадан ташқарига чиқмаган. Бироқ етакчи ўнталикда тез орада ўзгаришлар бўлиши муқаррар: “АвтоВАЗ” компанияси энг арзон Lada Priora моделини ишлаб чиқаришни бошлаши керак, Ravon арзон Nexia ва янгиланган Matiz’ни, Geely эса рестайлинг қилинган GC6 моделини савдога чиқаради.

Geely GС6

Chery Very

Chery Bonus

Renault Sandero

Lifan Smily new