Таиланд жанубида топилган самолёт бўлаклари Малайзия «Боинг»ига эмас, японияликлар ракетасига тегишли экани маълум қилинди

Япониянинг Mitsubishi Heavy Industries компанияси бироз олдинроқ Таиланл қирғоқлари яқинида топилган ва 2014 йилда йўқолган Малайзия «Боинг»ига тегишли бўлиши мумкинлиги айтилган самолёт бўлаклари аслида японияликлар ракетаси парчаси эканини маълум қилди. Бу ҳақда Associated Press агентлиги хабар берган.

Компания вакилининг фикрича, бу бўлак Япония жанубидан учирилган H-IIA ёки H-IIB ракеталарига тегишли.

Mitsubishi Heavy Industries вакили Сайо Суваситанинг айтишича, компания бу ракета айнан қачон ва қандай қилиб, бу ҳудудга келиб қолганини ўрганади.

Унинг қўшимча қилишича, ракета денгизга қулаганидан кейин узоқ масофага оқиб кетган бўлиши мумкин.

Қайд этилишича, Япония 2000 йилларнинг бошида H-IIA ва H-IIB ракеталарини учирганди. Охирги марта 2015 йилнинг ноябрида H-IIA ракетаси учирилган.

Malaysia Airlines’нинг Куала-Лумпурдан Пекинга учиб кетаётган самолёти 2014 йил 8 мартга ўтар кечаси радарлардан йўқолиб қолган эди. Кема бортида 239 киши бўлган.

Бироз олдинроқ, Таиланднинг жанубий соҳилларида самолёт бўлаклари топилган, улар 2014 йил мартида йўқолиб қолган Малайзия «Боинг»ига тегишли деб тахмин қилинганди.
Улкан қайрилма металл парчаси Накхонситхаммарт провинциясида қирғоққа чиқиб қолган, аҳоли уни аниқлаштиришда ёрдам сўраб ҳукуматга мурожаат қилган. Бўлакнинг катталиги энига икки метр, бўйига уч метрни ташкил қилган.

Топилма кўплаб тахминларни келтириб чиқарган, Таиланд ОАВи унинг Малайзия «Боинг»ига тааллуқлиги ҳақидаги версияни илгари сурганди.

Маълумот учун, Malaysia Airlines’нинг Куала-Лумпурдан Пекинга учиб кетаётган самолёти 2014 йилнинг 8 мартига ўтар кечаси радарлардан йўқолиб қолганди. Кема бортида 239 киши бўлган.

Reuters: Таиландда Малайзиянинг йўқолган Boeing самолёти бўлаклари топилгани тахмин қилинмоқда