АҚШда Jeep Wrangler негизида армия йўлтанламаси қурилади

АҚШ армиясининг пудратчиси ҳисобланадиган Hendrick Dynamics компанияси Jeep Wrangler жипи негизида енгил армия йўлтанламас автомобилини қуриш устида иш олиб бормоқда. Бу ҳақда The Detroit News нашри хабар бермоқда.

Нашр маълумотларига кўра, АҚШ армияси чекка жойларга ташлаш мумкин бўлган енгил, арзон, зирҳланмаган автомобилларни қуролланишга олмоқчи. Бу машиналар оғир зирҳланган техникани талаб қилмайдиган операция вақтида бориш қийин бўлган ҳудудлар бўйлаб қўшинларни ва юкларни ташиши мумкин бўлади.

Янги машина деярли Иккинчи жаҳон уруши вақтидаги Willys MB йўлтанламаси бажарган вазифаларни бажаради. Willys MB автомобили 1941 йилдан 1945 йилгача Толедода Willys-Overland Motors компанияси томонидан ишлаб чиқарилган.

2014 йилда Jeep компанияси “Виллис”га бағишланган Wrangler’нинг махсус моделини яратганди. Автомобиль ўзи блокланувчи дифференциалга эга Dana 44 орқа кўприги, BF Goodrich покришкалари, шатак троси ва такелаж скобасини ўз ичига олувчи махсус тўплам билан жиҳозланганди. Wrangler Willys Wheeler номли бу йўлтанламас 285 от кучига эга 3,6 литрли Pentastar двигатели ва олти поғонали “механик” ёки беш диапазонли “автомат” узатмалар қутиси билан жиҳозланган.

“Рэнглер”нинг фуқаролик версияси Fiat Chrysler Automobiles (FCA) уюшмасининг корхонасида ишлаб чиқарилади. Hendrick Dynamics вакилларининг айтишича, янги машинани серияли ишлаб чиқарилувчи автомобиль негизида яратилиши ишланмаларнинг қийматини анча камайтиришга имкон берди. Бундан ташқари, FCA дунёнинг кўплаб ҳудудларида ваколатхоналарига эга, шунинг учун армия машина учун эҳтиёт қисмларнинг етказиб берилишида муаммоларга дуч келмайди. Айни вақтда Hendrick Dynamics ҳарбий “Рэнглер”нинг 20 га яқин прототипини яратди.

Янги ҳарбий йўлтанламаснинг пайдо бўлиши муддатлари ҳозирча айтилмаяпти.